ज्यान मार्ने उद्देश्यले नेताहरूमाथि आक्रमण गरिएको दाहाल–नेपाल समूहको आरोप

जनकपुरधाम : नेकपा दाहाल–नेपाल समूहले आफ्ना नेताहरूको ज्यान मार्ने उद्देश्यले सुनियोजित रुपमा प्रहरीद्वारा आक्रमण गरिएको आरोप लगाएको छ । शुक्रबार बिहान आयोजित पत्रकार सम्मेलनमा प्रदेश २ का सांसद् शत्रुध्‍न महतोले केपी शर्मा ओलीको इसारामा प्रहरीद्वारा ज्यान मार्नेगरी आक्रमण गरिएको आरोप लगाए ।

शान्तिपूर्ण आन्दोलनका क्रममा आफ्ना पार्टीका शीर्ष नेताहरूमाथि ज्यान मार्ने उद्देश्यले बर्बरतापूर्वक लाठी र पचासौं राउण्ड गोली फायर गरिएको उनको आरोप छ । 
त्यस्तै नेकपा संघर्ष समिति धनुषाका इन्चार्ज सुधिर साहले पनि शान्तिपूर्ण आन्दोलनमा ओलीकै षड्यन्त्रमा आन्दोलनकारीमाथि गोली प्रहार भएको दाबी गरे । नेता कार्यकर्ताहरूमाथि गरिएको आक्रमणविरुद्ध चाँडै कडा आन्दोलनको घोषणा गर्ने उनले चेतावनी दिए । 

---

बिहीबार आमहड्तालको क्रममा जनकपुरधाममा गरिएको प्रदर्शनको क्रममा दाहाल–नेपाल समूहका एक दर्जनभन्दा बढी नेता कार्यकर्ताहरू घाइते भएका थिए । घाइतेमध्ये पूर्वमन्त्रीद्वय मातृका यादव र रामचन्द्र झासहित शहीदनगर नगरपालिका प्रमुख उदय बरबरिया, नेता प्रदीप साह गम्भीर घाइते भएका थिए । उनीहरूको हाल काठमाडौस्थित ट्रमा सेन्टरमा उपचार भइरहेको छ ।