ओलीका कारण लोकतन्त्र गुम्‍ने खतरा : मुख्यमन्त्री राउत

जनकपुरधाम : प्रदेश २ का मुख्यमन्त्री लालबाबु राउतले प्रधानमन्त्री केपी शर्मा ओलीका कारण लोकतन्त्रले दिएको अधिकार गुम्‍ने अवस्थामा पुगेको बताएका छन् । शुक्रबार ७१औं प्रजातन्त्र दिवसको अवसरमा आयोजित कार्यक्रमलाई सम्बोधन गर्दै मुख्यमन्त्री राउतले एक व्यक्तिको सत्‍ता लोभका कारण लोकतन्त्र समाप्त हुने अवस्थामा पुगेको बताए । लोकतन्त्रपछि प्राप्‍त उपलब्धी संघीयता र गणतन्त्रसमेत प्रधानमन्त्री ओली पार्टीको आन्तरिक विवादका कारण प्रतिनिधि सभा विघटन जस्ता अलोकतान्त्रिक/असंधानिक कदम चालेर समाप्त पार्न जुटेको बताए ।

यसविरूद्ध सम्पूर्ण  लोकतान्त्रिक शक्ति एक भएर अघि बढनु पर्ने उनको भनाइ छ । वर्तमान अन्यौलताबाट निकास र संविधानको रक्षाका लागि सम्पूर्ण लोकतन्त्र पक्षधरलाई सर्वोच्च अदालतले निकास दिनेमा विश्‍वास व्‍यक्‍त गरे । 'नेपाली जनताको पटक-पटकको बलिदानीबाट प्राप्त उपलब्धी हामी गुम्न दिने छैनौ,' उनले भने, 'अदालतले पनि यसको रक्षा गर्छ । अहिले अन्यौलताको स्थिति छ । तर,सर्वोच्चले उपलब्धिलाई बचाउँदै अन्यौलता हटाउनेमा विश्वस्त छु ।'

---

उनले यस संविधानमा रहेका केही त्रुटिलाई सच्याएर संविधान सबैको बनाउनुपर्ने बताए ।  यस विषयमा मतभेद कायम रहेको र यसका लागि आफूहरू संघर्षमै रहेको उनले धारणा राखे ।