जनकपुरधाम : जग्गा विवादकाका क्रममा भएकाे कुटपिटमा मारिएका सर्लाहीका दलित महेन्द्र महराको शव गत २६ दिनदेखि विरगंजस्थित नारायणी अस्पतालमा राखिएको छ । असोज २२ गते सर्लाही रामनगर गाउँपालिका ७ सिसौट निवासी महराको जग्गा विवादको क्रममा स्थानीय विनोद महराको कुटपिटबाट मृत्यु भएको थियो ।

कुटपिटबाट गम्भीर घाइते भएका महराको थप उपचारको क्रममा विरगञ्जस्थित नारायणी अस्पतालमा मृत्यु भएको थियो । घटना पश्चात प्रहरीले दोषीविरुद्ध मुद्दा दर्ता गर्न नमानेपछि प्रतिनिधिसभा सांसद अमरेश नारायण सिंह र कांग्रेस जिल्ला कार्यसमितिद्वारा दोषी अविलम्ब पक्राउ गरी कारवाही, पीडीतलाई उचित क्षतिपूतिको माग गर्दै दुई पटक आन्दोलन समेत भएको छ ।

---

पछिल्लो पटक असोज २८ गते मुद्दा दर्ताको माग गर्दै प्रहरीविरूद्ध गरेको प्रदर्शनको क्रममा एक पत्रकार, पीडित परिवारका सदस्यसहित ४ दर्जन व्यक्ति घाइतेसमेत भएका थिए । 

प्रहरीले मुद्दा दर्ता नगरेपछि अन्ततः एक हप्ता अगाडि हुलाकमार्फत नेपाली कांग्रेसको सहयोगमा पीडित परिवारले मुद्दा दर्ता गराएका छन । घटनाको २६औं दिनसम्म प्रहरीले दोषीलाई पक्राउने प्रयास गरेको भन्दै आफन्तले अस्पतालबाट शव उठाएका छैनन् । शव नारायणी अस्पतालमै अलपत्र छ ।

प्रतिनिधिसभा सांसद अमरेशनारायण सिंहले भने दोषी भनिएका व्यक्तिहरु सत्ताधारी नेकपाको नेता/कार्यकर्ता रहेका कारण प्रहरीले हालसम्म पक्राउ गरी कारवाही प्रक्रिया बढाउन नसकेको आरोप लगाए ।

दोषीलाई कारवाही र पीडित परिवारलाई क्षतिपूर्ति नदिएसम्म आन्दोलन जारी रहने उनले बताए । घटनामा संलग्न भएको आरोपमा प्रहरीले तीन जनालाई पक्राउ गरी अनुसन्धान प्रक्रिया अघि बढाएको जिल्ला प्रहरी कार्यालय सर्लाहीका प्रवक्ता एवं नायब उपरीक्षक मदनसिंह कुँवरले जानकारी दिए ।

तर पीडित परिवारले भने घटनामा नेकपा कार्यकर्ता विनोद महरासहित ११ जना संलग्न रहेको भन्दै प्रहरीले दोषलाई उन्मुक्ति दिन खोजेको आरोप लगाउँदै आएका छन् । 

यसरी भयाे घटना

करीब एक वर्षदेखि सार्वजनिक बाटोको जग्गा विनोद महराले मिचेको भन्दै महेन्द्र महरा लगायतका स्थानीयबीच विवाद  थियो । सो विषयमा जिल्ला अदालतमा मुद्दा समेत चलिरहेको छ ।

मृतकका भाइ यदुनन्दन महराले अदालतमा मुद्धा चलिरहेकै बेला विनोद महरालगायतका व्यक्तिहरुले घरमै आएर कुटपिट गरेको बताए । त्यस पश्चात पटक पटक दुवै पक्षबीच विवाद र झडप भइरह्यो ।

असोज २२ गतेका दिन आफू घरमा नरहेको अवस्थामा मृतक महेन्द्रका बुहारीलाई विवादकै क्रममा विनोदका परिवारिक सदस्यहरुले कुटपिट गरेको उनले बताए । ‘सोही क्रममा दाजु महेन्द्रले बचाउन खोज्दाा विनोदलगायतका ११ जना व्यक्तिले निर्घात रुपमा कुटपिट गरी घाइते बनाए ।’

घटना पश्चात उपचारको लागि मलंगवास्थित जिल्ला अस्पतालमा लगियो । तर त्यहाँ उपचार सम्भव नभएपछि थप उपचारका लागि विरगंज नारायणी अस्पतालमा पठाइयो र उपचारकै क्रममा उहाँको निधन भयो ।’

निधनपछि प्रहरीले शव परिवारको जिम्मा लगायो । तर घर ल्षउँदै गर्दा नारायण पुल नजिकबाट प्रहरीले शव नियन्त्रणमा लिएर पुनः अस्पताल नै लग्यो ।
प्रहरीले शव नियन्त्रणमा लिने क्रममा आफूहरुले मलंगवा जिल्ला अस्पतालमै पोष्टमार्टम गराउने भने पनि प्रहरीले नमानेको उनले बताए ।