एमालेभित्र संसदीय दलको नेता र प्रमुख सचेतकका विषयमा विवाद

जनकपुरधाम : प्रदेश २ मा नेकपा एमालेभित्र संसदीय दलको नेता र प्रमुख सचेतकका विषयमा विवाद उत्पन्न भएको छ । नेकपा एमाले र माओवादी केन्द्र ब्‍युँतिएपछि प्रदेश २ मा एमालेभित्र संसदीय दलको नेता र प्रमुख सचेतक पदका लागि विवाद उत्पन्न भएको हो ।

तत्‍कालीन नेकपा प्रदेश २ मा ओली समूहका सत्यनारायण मण्डललाई प्रमुख सचेतक र सुन्दरबहादुर विश्वकर्मालाई संसदीय दलको नेतामा चयन गरिएको थियो । पछिल्लो पटक पुस २१ गते ओली समूहका मण्डललाई अविश्वासको प्रस्ताव लगाई दाहाल-नेपाल समूहले हटाएर नेपाल पक्षका शत्रुध्न महतोलाई संसदीय दलको नेतामा चयन गरेका थियो । 

---

तर एमाले र माओवादी ब्‍युँतिएपछि एमालेभित्र संसदीय दलको नेताका लागि विवाद उत्पन्न भएको हो । प्रदेश सभाको आगामी बस्ने बैठकमा एमाले र माओवादी केन्द्र दुवैको संसदीय दलका नेताको कुर्सीमा को बस्ने भन्ने अन्यौल छ । एमालेभित्र विवाद देखिए पनि माओवादी केन्द्रले पनि नेता चयन गर्न सकेको छैन । चैतको पहिलो साता बस्ने प्रदेश सभाको बैठकमा एमालेको तर्फबाट नेताको कुर्सीमा सत्यनारायण मण्डल वा शत्रुध्न महतो को बस्ने विवाद छ ।

सभामुख सरोजकुमार यादवले एमाले र माओवादी केन्द्र दुवैले नेता र प्रमुख सचेतक विवाद बैठक बस्नु अघि निक्र्यौल गरेर नामावली दिनुपर्ने बताए । 

ओली समूहका नेता मण्डलले पार्टीले निर्णय गर्ने र त्‍यसलाई सवैले स्वीकार गर्ने बताए । उनले आफूलाई के कति कारणले हटाइएको थियो जवाफ दिनुपर्ने समेत बताए । 'पछिल्लो पटक केही हाम्रा साथीहरू बहकाउमा परेर पार्टीकै विरोधमा लागेका थिए,' उनले भने, 'पार्टीभित्र कुनै छलफल नै नगरी विद्रोही समूहसँग मिलेर एकलौटी रूपमा आफूलाई नेताको पदबाट हटाए । कुन आधारमा हटाइयो र महतोलाई नेता चयन गरियो भन्ने जवाफ दिनुपर्छ । पार्टीमा विद्रोह गरी अनुशासनविपरीत कार्य गर्नेलाई कारबाही गर्नुपर्छ ।'

माधव पक्षका नेता महतोले पछिल्लो राजनीतिक परिस्थितिअनुसार आफू दलको नेता चयन भएको दाबी गरे । 'संवैधानिक व्यवस्थाअनुसार नै बहुमत र प्रक्रिया पुर्‍याएर नेतामा चयन गरिएको हो,' उनले भने, 'अहिले राजनीतिक परिस्थिति परिवर्तनपछि पार्टी नै पुर्ववत अवस्थामा फर्कियो, पुनः नयाँ नेता र सचेतक हुनेछ ।'