बागमतीका साढे बाह्र लाख बालबालिकालाई टाइफाइड विरुद्धको खोप

मकवानपुर- भोलि २५ चैतबाट सुरु हुने टाइफाइड खोप अभियान अन्तरगत बागमती प्रदेशका १२ लाख  ५२ हजार ५ सय ३९ जना बालबालिकाहरुले सेवा लिने भएका छन् ।

उक्त संख्याको बालबालिकाहरुलाई खोप लगाउनको लागि प्रदेशभर ६ हजार ५ सय २० खोप केन्द्र रहने छ । यसैगरी ८ हजार ८ सय ५८ खोपकर्मी र १ हजार ७ सय जना महिला स्वास्थ्य स्वयमसेविकाहरु परिचालन हुने छन् ।

---

नेपाल सरकारले २५ चैतबाट सुरु गर्न लागेको अभियान अन्तरगत प्रदेशको स्वास्थ्य मन्त्रालयले आज पत्रकार सम्मेलन मार्फत यस्तो तथ्याङ्क सार्वजनिक गरेको हो ।
अभियानको लागि आवश्यक सबै तयारीहरु पुरा भएको प्रदेश स्वास्थ्य निर्देशनालयका निर्देशक महेश्वर श्रेष्ठले बताए । १५ महिनादेखि १५ वर्ष उमेर समूहका बालबालिकाहरुलाई यो खोप लगाइँदै छ ।

तोकिएको उमेर समूहका बालबालिकालाई तोकिएको अभियानमा खोप लगाउन छुटेमा यो पछि लगाउन पाइने छैन । त्यसैले सबैलाई अभियानमा सहभागी हुन अनुरोध गरिएको छ ।

यो खोप अन्तराष्ट्रिय मापदण्ड अनुसारको भएकोले कुनै पनि आशंका नगरी खोप लिन स्वास्थ्य निर्देशक श्रेष्ठले आग्रह गरे । मासुमा लगाइने यो खोप शून्य दशमलव ५ एम.एल लगाइनेछ ।

टाइफाइड रोग पानी र खानाको कारण हुने रोग हो । नेपालमा प्रत्येक वर्ष ४ लाख ५० हजार जना टाइफाइडको कारण संक्रमित हुने गरेका छन् । संसारमा प्रतिवर्ष यो रोगको कारण १ लाख ६१ हजारको ज्यान जाने गरेको निर्देशनालयका चिकित्सा तथा रोग नियन्त्रण महाशाखाका प्रमुख नरेन्द्र झाले बताए ।

उनका अनुसार उमेर समूहको हिसाबमा यो अन्यको तुलनामा बालबालिकालाई १० गुण बढी संक्रमण हुने गर्दछ ।

टाइफाइड पित्तथैलीको क्यान्सरको कारण समेत बन्न सक्दछ, र यो उपचारमा खर्चिलो हुने गरेको छ। यो अभियानका प्रयोग गरिने खोप ९७ प्रतिशत प्रभावकारी र अन्तराष्ट्रिय मापदण्ड अनुसार रहेको उनले बताए ।

ज्वरो साल्मोनेला टाइफी र पाराटाईफी ‘ए’, ‘बी’ तथा ‘सी’ प्रजातिका ब्याक्टेरियाको संक्रमणका कारणले टाइफाइड रोग व्यक्तिमा सर्ने गर्छ । टाइफाइड सबै व्यक्तिमा संक्रमण हुने रोग होे । गर्मी महिना लागेपछि टाइफाइडको संक्रमण बढी हुने गर्दछ । दुषित खाना तथा दुषित पानीको सेवनले यो रोगको संक्रमण हुने गरेको छ । टाइफाइड संक्रमणका मुख्य लक्षण उच्च मात्रामा ज्वरो आउनु, खान मन नलाग्नु, पेट दुख्नु, वान्ता आउन सक्ने झाले बताए ।

देशैभर सञ्चालन हुने यो अभियानको थालनी बागमती प्रदेशमा भोलि संघीय सरकारका स्वास्थ्य मन्त्री विरोध खतिवडाले मकवानपुरको मनहरी गाउँपालिका–५ स्थित भोजसिद्ध माविको खोप केन्द्रबाट खोप अभियान सुरु गर्ने कार्यक्रम रहेको छ।