बुटवल : लुम्बिनी प्रदेशमा एक जना राष्ट्रियसभा सदस्यका लागि सोमबार हुन लागेको मतदानको पूर्वसन्ध्यामा ४ जना मतदाता थपिएका छन् । पार्टीले प्रदेश सांसदबाट हटाएका जसपाका ४ जनालाई मतदान सुरू हुनुभन्दा १६ घन्टाअघि निर्वाचन आयोगले मतदानको अधिकार दिएको हो।

निर्वाचन आयोगले आइतबार जनता समाजवादी पार्टीबाट मन्त्री बनेका ४ जना सांसदलाई पनि पूरक मतदाताको अधिकार दिएको जिल्ला निर्वाचन कार्यालय दाङका सूचना अधिकारी गेहेन्द्र कुँवरले जानकारी दिए। योसँगै लुम्बिनी प्रदेशमा ८३ जना प्रदेश सभा सदस्यले मताधिकार पाएका छन् ।

---

यसअघि जसपाको एक समूहले सांसदहरू कल्पना पाण्डेय, सन्तोषकुमार पाण्डेय, सुमन शर्मा रायमाझी र विजयबहादुर यादवलाई कारबाही गरेको थियो। उनीहरू मुख्यमन्त्री शंकर पोखरेलको सरकारमा मन्त्री छन्। उनीहरूलाई पार्टीको सिफारिसमा सभामुखले पदमुक्त गरेका थिए । ४ जनाले सर्वोच्चम मुद्दा दायर गरेका थिए । सर्वोच्चले उनीहरूलाई पदमुक्त गर्ने निर्णय तत्काल कार्यान्वयन नगर्न आदेश दिएको थियो । 

पार्टीले कारबाही गरेको हुँदा उनीहरूले मतदान गर्न नपाउने भनिएको थियो। त्यसैले प्रदेश सभामा त्यसअघिसम्म कूल मतदाता ७९ जनामात्रै रहेको निर्वाचन कार्यालयले जानकारी दिएको थियो। यो निर्वाचनमा एक जना प्रदेश सभा सदस्यको मतभार ४८ रहन्छ। 

निर्वाचनको पूर्वसन्ध्यामा आयोगले गरेको यो निर्णयलाई विपक्षी गठबन्धनले जालझेलको संज्ञा दिएको छ। काँग्रेसका प्रदेश सभा सदस्य फकरुद्विन खानले सत्ताको आडमा अन्तिम नामावली र दावी विरोधको समय सकिएपछि चलखेल भएको बताए । 

‘यो सत्ताको दुरुपयोग हो, संवैधानिकअंगहरु पनि सत्ताको निर्देशनमा निर्णय फेर्नु गलत हो’ उनले भने । अर्घाखाँचीमा माओवादी केन्द्रबाट राष्ट्रिय सभा सदस्य निर्वाचित चन्द्रबहादुर खड्का एमाले प्रवेश गरेपछि उनलाई पार्टीले कारबाही गरेको थियो। उनी पदमुक्त भएपछि सोही ठाउँमा सोमबार उपनिर्वाचन हुन लागेको छ।

दाङको घोराहीस्थित कर्मचारी मिलन केन्द्रमा सोमबार बिहान ९ बजेदेखि दिउँसो ३ बजेसम्म मतदान हुने छ। विपक्षी गठबन्धन नेपाली कांग्रेस, नेकपा माओवादी केन्द्र, जनता समाजवादी पार्टीको उपेन्द्र यादव र बाबुराम भट्टराई समूह, राष्ट्रिय जनमोर्चा र नेकपा एमालेभित्रको वरिष्ठ नेता माधवकुमार नेपाल समूहले कपिलवस्तुका दृगनारायण पाण्डेलाई उम्मेदवार बनाएको छ। उनी हालै मात्र प्रदेश सभा सदस्यबाट राजीनामा दिँदै एमाले परित्याग गरी नेपाली कांग्रेस प्रवेश गरेका थिए।

त्यस्तै माओवादी परित्याग गरी नेकपा एमालेमा प्रवेश गरेका खड्कालाई एमालेको समर्थन छ। उनलाई जसपाको महन्थ ठाकुर पक्षको समर्थन छ।