निजामती सेवासम्बन्धी विधेयक प्रस्तुत

कैलाली - सुदूरपश्चिम प्रदेशसभाले ‘सुदूरपश्चिम सवारी तथा यातायातसम्बन्धी व्यवस्था गर्न बनेको विधेयक’लाई दफाबार छलफलका लागि अर्थ, विकास तथा प्राकृतिक स्रोत समितिमा पठाएको छ ।

प्रदेशसभाको आजको बैठकले भौतिक पूर्वाधार राज्यमन्त्री कुलवीर चौधरीले दफाबार छलफलका लागि उक्त विधेयकलाई अर्थ, विकास तथा प्राकृतिक स्रोत समितिमा पठाइयोस् भनी पेश गरेको प्रस्तावलाई सर्वसम्मतिले स्वीकृत गरेको थियो । 
  
बैठकमा विधायन तथा प्रदेश मामिला समितिका सभापति नेपालु चौधरीले समितिमा दफाबार छलफल भई तयार पारिएको सुदूरपश्चिम प्रदेश निजामती सेवाको गठन, सञ्चालन र सेवाका शर्त सम्बन्धमा व्यवस्था गर्न बनेको विधेयक, २०७८ सम्बन्धी प्रतिवेदन प्रस्तुत गरेका थिए । निजामती सेवाको गठनसम्बन्धी यो विधेयक विसं २०७८ असारमा प्रदेशसभा सचिवालयमा दर्ता गरिएको थियो । 
 
सभामुख अर्जुनबहादुर थापाले संघीय निजामती सेवासम्बन्धी विधेयकसँग प्रदेशको निजामती सेवासम्बन्धी विधेयक बाझिएको हकमा यो विधेयकलाई संशोधन गर्न सकिने हुँदा दर्ता भएको विधेयकको बाँकी प्रक्रिया अघि बढाइएको बताए । 

---

'पछि विधेयक ल्याउनुभन्दा संशोधनमा जानु सजिलो देखिएकाले यो विधेयक अघि बढाइएको हो”, सभामुख थापाले भने, “संघीय निजामती कानुनसँग बाझिएको हकमा प्रदेशको निजामती कानुन पनि संशोधन गर्न सकिन्छ ।' रासस