सेयर बजारमा अवाञ्छित गतिविधि हुन दिन्‍न - अर्थमन्त्री पौडेल

काठमाडौं - उपप्रधानमन्त्री तथा अर्थमन्त्री विष्णु पौडेलले सेयर बजारमा अवाञ्छित गतिविधि हुन नदिन आवश्यक निर्देशन दिएको बताएका छन् । 

शुक्रबार सिंहदरबारमा बसेको प्रतिनिधिसभाको अर्थसमिति बैठकमा अर्थमन्त्री पौडेलले सेयर बजार अर्थतन्त्रको महत्वपूर्ण आधार स्तम्भ भएको भन्दै यसलाई प्रभाव पार्ने कुनै अवाञ्छित गतिविधि हुन नदिन आवश्यक निर्देशन दिएको बताएका हुन् । 

---

उनले सेयर किनबेचमा आएको समस्यालाई समेत अध्ययन गर्न निर्देशन दिएको जानकारी दिए । उनले बजेट कार्यान्वयन गर्दा सुरु भएका र प्रतिफल दिने योजनामा बजेट विनियोजन हुनुपर्नेमा जोड दिए । अर्थमन्त्री पौडेलले मुलुकको आवश्यकताका आधारमा विदेशी सहायता लिनुपर्ने र यसको कार्यान्वयनमा समेत ध्यान दिनुपर्ने बताए । 

बैठकमा समिति सदस्य डा‍. प्रकाशशरण महतले सेयर बजारमा देखापर्ने अराजक गतिविधिलाई नियन्त्रण गर्नुपर्ने बताए । उनले कमजोर कम्पनीको सेयर ह्वात्तै बढ्दा चलखेल भएको हुन सक्ने आशंका व्यक्त गरे । 

राष्ट्रिय अर्थतन्त्रका समसामयिक विषयमा छलफल गर्न समितिले अर्थमन्त्रीलाई बोलाएको थियो ।