प्रदूषण अझै केही दिन रहने, सुरक्षित रहने यस्ता छन् उपाय

काठमाडौँ : उपत्यकासहित आसपासका जिल्लामा रहेको वायु प्रदूषण अझै केही दिन रहने भएको छ । जल तथा मौसम विज्ञान विभाग अन्तर्गतको मौसम पूर्वानुमान महाशाखाले आगामी बिहीबारसम्म वायु प्रदूषण कायमै रहने बताएको हो । महाशाखाले नयाँ मौसमी प्रणाली सक्रिय नहुँदा काठमाडौँमा जमेर बसेको धुवाँ, धुलो र तुवाँलो हट्न अझै केही दिन लाग्‍ने बताएको छ । उपत्यकामा प्रदूषण बढ्नुका साथै डढेलोका कारण मौसम सफा हुन नसकेको मौसमविदको भनाइ छ ।

‘डढेलोका कारण प्रदूषणको चाप बढेर धुँवा, धुुलोका कण वायुमण्डलको तल्लो तहमा जम्मा भएका छन्’ महाशाखाकी मौसमविद् गंगा नगरकोटीले भनिन्, ‘नयाँ मौसमी प्रणाली सक्रिय नभएसम्म अवस्था यस्तै रहन्छ ।’ 

---

वायु प्रदूषण बढेका बेला सुरक्षित रहनुपर्ने स्वास्थ्यकर्मी बताउँछन् । बाहिर हिँड्दा मास्क लगाउनुपर्ने सरुवा रोग अस्पताल टेकुका डा.शेरबहादुर पुन बताउँछन् । तर यो व्यावहारिक नहुने डा.पुनको भनाइ छ । वायु प्रदूषणले बालबालिका, वृद्ध र कोभिड–१९ संक्रमितलाई थप समस्या हुन सक्ने उनी बताउँछन् ।

‘वायु प्रदूषणले बालबालिका र वृद्धलाई समस्या पार्छ’ डा.पुन भन्छन्, ‘रोग प्रतिरोधात्मक क्षमता कम भएका व्यक्तिलाई बढी असर गर्छ । त्यस्तै कोभिड संक्रमितलाई पनि वायु प्रदूषणले असर गर्छ । यो तत्कालै नदेखिए पनि हाम्रो स्वास्थ्यमा दीर्घकालिन असर पुर्‍याउँछ ।’

वायु प्रदूषणबाट जोगिन सकेसम्म घरबाहिर ननिस्कन डा.पुनको सुझाव छ । निस्कनै परे मास्क अनिवार्य लगाउन र प्रदूषणको मात्रा नघटेसम्म सुरक्षित भएर बस्नु उचित हुने डा.पुनले बताए ।

‘प्रदूषण बढेका बेला घरभित्रै बस्नु सबैभन्दा उत्तम उपाय हो’ उनी भन्छन्, ‘तर काम गर्नुपर्ने भएकाले यो व्यावहारिक नहोला । घरबाहिर हिँड्नुपरे मास्क अनिवार्य लगाउनुपर्छ । दीर्घरोगीलाई अलि धेरै हेरविचार गर्नुपर्छ ।’ वायु प्रदूषण रोक्न सरकारले दीर्घकालिन योजना ल्याएर काम गर्नुपर्ने डा. पुनको भनाइ छ ।