एक सय ५० देशका राष्ट्रिय गान गाउने रामजीको ‘विश्व यात्रा’

ढोरपाटन- चोक-चोकका चिया पसलमा होस् वा मेला महोत्सव होस् राष्ट्रिय गान गुनगुनाउने रामजी नेपालीको लतै बनिसक्यो । उनी नेपालको मात्रै होइन विभिन्न एक सय ५० भन्दा बढी देशका राष्ट्रिय गान गाउँछन् ।

उनले हालसम्म ११ वटा देश पुगेर ती देशका राष्ट्रिय गान गाइसकेका छन् । विश्वका सबै देशको राष्ट्रिय गान गाउने तयारीमा रहेका उनी हाल ८२ देशका राष्ट्रिय गान गाउने तयारीमा छन् । 

---

जिल्लाको बागलुङ नगरपालिका-६ का ४३ वर्षीय नेपालीले राष्ट्रिय गान गाउँदै विश्व यात्रामा हिँडेको आठ वर्ष भयो जसले उनलाई विश्वयात्रीका रूपमा स्थापित बनाइसकेको छ ।

सन् २०१५ देखि विभिन्न देशको राष्ट्रिय गान गाएर विश्व यात्रा थालेका नेपाली अहिलेसम्म युरोपका विभिन्न देश, युएई, भारत गरी ११ देशको यात्रा गरिसकेका छन् । उनले जुन देशमा पुग्छन्, उही देशकै भाषमा राष्ट्रिय गान गाउँछन् । पछिल्लो २५ वर्षदेखि नेपाली गीत सङ्गीतमा आबद्ध उनले राष्ट्रिय गानमार्फत् विश्वबन्धुत्वलाई थप बलियो बनाउने बताए । 

नेपाललाई अन्तर्राष्ट्रिय पर्यटनसँग जोड्नका लागि आफूले विश्वका विभिन्न देशको राष्ट्रिय गान गाउँदै हिँडेको बताए ।

'हाम्रो देश नेपालमा कैयन धार्मिक तथा पर्यटकीय ठाउँ छन्, अहिलेसम्म यी ठाउँमा अन्तर्राष्ट्रिय पर्यटक आउन सकेका छैनन्, उनीहरूलाई नेपाल ल्याउन, यहाँको पर्यटनलाई विश्वसँग जोड्नका लागि विश्व यात्रा थालेको हुँ,' उनले भने, 'विगतमा नेपालीका लागि गाउथेँ भने आज विश्वका मानिसका लागि गाइरहेको छु ।' 

संसारसामू नेपाल चिनाउनका लागि आफूले विश्व यात्रा तय गरेको नेपालीको भनाइ छ । राष्ट्रिय गानले विश्वलाई एक ठाउँ जोड्ने हुँदा आफू यो अभियानमा लागेको उनले बताए । राष्ट्रिय गानले आत्मीयता बढाउने र भाइचाराको सम्बन्ध बढाउने उनको अनुभव छ । 

उनले विश्व यात्राका लागि विभिन्न व्यक्ति तथा सङ्घ संस्थाबाट सहयोग जुटाउँदै आएका छन् । विश्व यात्रामा लागिरहँदा तितामिठा दुवै अनुभूति रहेको उनी सम्झन्छन् । उनी भन्छन्, 'जसले पनि आफ्नो देशलाई माया गर्छ, त्यसले गर्दा आत्मसम्मानको अनुभूति गर्दा रहेछन्, जुन देशको राष्ट्रिय गान हो त्यही देशको भाषामा गाउँदा उनीहरूलाई गर्व लाग्दो रहेछ त्यसले सम्बन्ध जोड्न मद्दत गर्ने रहेछ ।'

यात्राका क्रममा उनले पैदल, गाडीदेखि जहाजसम्म जे भेटिन्छ त्यसैमा यात्रा गर्ने गरेका छन् । तर, सबैभन्दा पैदल यात्रामा आनन्द हुने उनको अनुभव छ ।'