एक वर्षमा दुई सय ६१ जना किशोरी बेचिनबाट जोगिए

भक्तपुर- विश्व सेवा विस्तार संस्थाले पछिल्लो एक वर्षमा नेपाल-भारत सीमाका तीनवटै नाकाबाट दुई सय ६१ जना किशोरीलाई बेचबिखन हुनबाट जोगाएर घर फर्काउन सफल भएको जनाएको छ ।

संस्थाको आर्थिक वर्ष २०७९/८० को बुधबार भक्तपुरमा भएको सामाजिक लेखा परीक्षण कार्यक्रममा शंकास्पद पाँच हजार दुई सय ४२ जनालाई सोधपुछ गरिएको जानकारी गराइको छ । 

---

संस्थाले नेपाल भारतका तीन वटा सीमा नाका काकरभिट्टा, विराटनगर र भद्रपुरमा तीन वटा सीमा नाकाबाट मानव बेचबिखनको सम्भावना भएका किशोरीलाई जोगाउन निगरानी गर्दै आएको जनाएको छ । 

संस्थाकी कार्यक्रम निर्देशक सरस्वती मानन्धरले आर्थिक वर्ष २०७१/७२ देखि जिल्ला प्रशासन कार्यालय भक्तपुरमा दर्ता गरी संस्थाले मानव बेचबिखनबाट जोगाउने उद्देश्यका साथ काम गरिरहेको बताइन् ।

कार्यक्रममा संस्थाका अध्यक्ष अर्शाककुमार प्रधान, प्रमुख अतिथि प्रहरी बृत ठिमीका प्रहरी निरीक्षक सञ्जीव ओली, समाज कल्याण परिषद्का सहायक निर्देशक राजेन्द्र उप्रेती, सञ्चारकर्मी केशव लुइँंटेललगायतले मानव बेचबिखनबाट रोक्न सामूहिक पहल आवश्यक भएको बताए ।