समाज

कोभिड संक्रमण

बाबुको दाहसंस्कार नसकिँदै छोराको मृत्यु

विक्रम खड्का |
जेठ ३, २०७८ सोमवार १६:४६ बजे

 बुटवल  : दाङको हापुरेका ३३ वर्षीय संचारकर्मी लक्ष्मण बस्नेत कोभिडले थलिए । कोभिडसँग मिल्दोजुल्दो रुघाखोकी र ज्वरो आए पनि उनी सुरुमा त्यसलाई परास्त गरेरै छाड्ने संकल्पका साथ अघि बढे । 

तर, बिमारले च्याप्दै लगेपछि उनी स्थानीय लाइफ केयरमा पुगे । त्यस लगत्तै उनका पितालाई पनि सोही खालको लक्षणसहितको बिमारले च्याप्न थाल्यो । तत्काल प्रभावकारी उपचारको खोजीमा उनीहरू रुपन्देहीको भैरहवास्थित युनिर्भसल मेडिकल कलेजमा आए । हार गुहार गरेर उनीहरू अस्पतालमा भर्नासम्म हुन पाए ।


पत्रकार महासंघ दाङका अध्यक्ष दुर्गालाल केसीका अनुसार उनीहरूलाई मेडिकल कलेजमा बल्लतल्ल भनाए गरिएको थियो । त्यसपछि कोरोना परीक्षणदेखि अन्य उपचारहरू क्रमश हुँदै गए । झण्डै १५ दिनसम्म बाबु छोराकै अस्पतालमा उपचार भयो । त्यसबीचमा उनीहरूको रेखदेखका लागि बसेकी लक्ष्मणकी श्रीमती निकै तनावमा थिइन् । कहिले बिरामीका लागि आईसियु भेन्टिलेटर त कहिले अक्सिजन अभावको तनाव उनलाई थियो । 

श्रीमान पत्रकार भएकाले उनले पत्रकार सम्बन्ध संघ-संगठन गुहारेर ती सबै अभावहरूको पूरा गरेकी थिइन् । त्यतिमात्र होइन, बस्नेतको उपचारका लागि दाङमा  सहयोग अभियान पनि चलेको थियो । केही पैसासमेत उनका लागि प्राप्त भएको थियो । अस्पतालमा एचडियु, आईसियु र भेन्टिलेटर सबैको व्यवस्था विस्तारै भएको थियो ।

अस्पतालका प्रशासन प्रमुख सुशील गुरुङले बाबु छोराको उपचारका लागि अस्पतालले सबै प्रयास गरेको बताए । उनले भने, ‘उहाँहरूको उपचारका लागि पत्रकारहरूको पनि धेरै फोन आएको थियो, सबै प्रयास भएका थिए, तर मलाई लाग्छ उहाँहरू ढिलो अस्पताल आउनु भएको पनि हुन सक्छ ।’

उपचारकै क्रममा जेठ २ गते लक्ष्मणका पिता टोपबहादुर बस्नेतको निधन भयो । अस्पतालको बेडमा छटपटाई रहेकोका लक्ष्मणलाई खबर थिएन । पिताको कोरोना परीक्षण गर्दा नेगेटिभ रिर्पोट आइतबार नै आएको थियो । लक्ष्मणको त केही दिन अघि नै रिर्पोट नेगेटिभ थियो । लक्ष्मणकी श्रीमतीले बीचमा सुधार भैरहेको सूचना दिएको र आर्थिक रुपमा धेरै खर्च लाग्ने बताएपछि आफूहरू सहयोग अभियानमा जुटेको महासंघका अध्यक्ष केसीले बताए । 

रिर्पोट नेगेटिभ आएपछि लक्ष्मणका पिताको अन्तिम संस्कारका लागि दाङ लैजाने तयारी भैरहेको थियो । आफन्तहरू त्यसको सरजाम गर्दै थिए तर सोमबार दिउँसो लक्ष्मणको पनि मृत्यु भएको छ । महासंघ दाङका कोषाध्यक्ष सरद केसीले भने, ‘बाबुको  दाहसंस्कार नसकिँदै छोरा लक्ष्मणको मृत्यु भयो, पीडा असैह्य भयो ।’ 


Author

विक्रम खड्का

खड्का इकागजका लुम्बिनी प्रदेश प्रतिनिधि हुन् ।


थप समाचार
x