श्रमजीवी पत्रकारका पक्षमा पत्रकार महासंघले आन्दोलन गर्ने

काठमाडौँ- नेपाल पत्रकार महासंघले श्रमजीवी पत्रकारका पक्षमा आन्दोलन गर्ने भएको छ । सञ्चारग्राममा आज श्रमजीवी पत्रकारका समस्याका विषयमा आयोजना गरिएको अन्तरक्रियामा पछिल्लो समय श्रमजीवी पत्रकारलाई विभिन्न सञ्चारगृहले न्यूनतम पारिश्रमिक नदिएको तथा सेवाबाट नै हटाउन थालेको उजुरी परेपछि महासंघ बाध्य भएर आन्दोलनमा उत्रिन लागेको जनाएको छ ।

कार्यक्रममा महासंघका वरिष्ठ उपाध्यक्ष रमेश विष्टले श्रमजीवी पत्रकारका समस्या समाधान गर्न महासंघले यही साउन २६ देखि श्रम कार्यालयमा धर्ना दिने तथा भदौ १ गते पुराना सम्झौता कार्यान्वयन नभएका तथा श्रमजीवी पत्रकारलाई न्यूनतम पारिश्रमिक नदिने सञ्चार प्रतिष्ठान घराउ गरिने जानकारी दिए ।

---

यसैगरी महासंघले श्रमजीवी पत्रकारको पारिश्रमिकका लागि वार्ता, सम्वाद, कानुनी तथा घेराउका कार्यक्रम सँगसँगै लिएर अगाडि बढ्ने जनाएको छ । सोही कार्यक्रममा बोल्दै पत्रकार महासंघका महासचिव रोशन पुरीले श्रमजीवी पत्रकारको मुद्दामा नेपाल पत्रकार महासंघ सधैं अग्रसर रहने जानकारी गराए । 

उक्त कार्यक्रममा विभिन्न सञ्चारगृहले पारिश्रमिक नदिएको, बिनाकारण कामबाट निकालेको जस्ता थुप्रै विषयमा पीडितले आफ्ना गुनासा राखेका थिए ।