९५ वर्षीया न्यौपानेले उद्‌घाटन गरिन पाखरदोभान प्रतिक्षालय

काठमाडौँ- सिन्धुपाल्चोकको सुनकोशी गाउँपालिका-६ कोठे पाखरदोभान सडकखण्डमा पर्ने बागखोरमा प्रतिक्षालयको उद्घाटन गरिएको छ । शनिबार ९५ वर्षीया रेणुकुमारी न्यौपानेले प्रतिक्षालयको उद्घाटन गरेकी हुन् ।

---

पाखरदोभान एकता समाजको समन्वयमा समाजका उपाध्यक्ष राजकुमार श्रेष्ठको संयोजकत्वमा प्रतिक्षालय निर्माण गरिएको थियो । उक्त प्रतिक्षालय निर्माणका लागि विभिन्न व्यक्तिहरूले सहयोग गरेका थिए । 

उक्त प्रतिक्षालय निर्माणका लागि ५१ जनाले आर्थिक सहयोग गरेका थिए । १ लाख ३५ हजार रुपैयाँ लागतमा प्रतिक्षालय निर्माण गरेको समाजका अध्यक्ष भूपेन्द्र भण्डारीले जानकारी दिए । प्रतिक्षालय निर्माण चन्दा र श्रमदानबाट भएको उनले बताए ।

पाखरदोभान एकता समाजले गाउँमा हुने विकास निर्माणका काममा सहयोग गर्दै आएको समाजका अध्यक्ष भण्डारीले जानकारी दिए । समाजको समन्वयमा अहिलेसम्म विजुलीको कालो तार फेर्न, कोठे पाखरदोभान मोटर बाटो स्तरउन्नती गर्न, एक घर एक धारा खानेपानीको योजनाका लागि समन्वय गरेको भण्डारी जानकारी दिए । 

त्यस्तै समाजका सदस्यद्वय शक्ति श्रेष्ठ र हरिशरण थापालाई २०७९ सालको माध्यमिक शिक्षा एसईई उतिर्ण हुन सफल भएकोमा नगदसहित सम्मान गरिएको छ । समाजले विभिन्न २५० विरुवा रोपेको छ ।