गृह मन्त्रालयको महावीर पुनलाई चेतावनीः विभूषण लिलामी गरे रद्द हुन्छ

काठमाडौँ- गृह मन्त्रालयले राष्ट्रिय आविष्कार केन्द्रका संस्थापक महावीर पुनलाई विभूषण लिलामीमा राखे रद्द गर्ने चेतावनी दिएको छ । मंगलबार मन्त्रालयको विभूषण तथा सभा समारोह प्रबन्ध शाखाले पुनलाई पत्र पठाएर विभूषण लिलामीमा नराख्न चेतावनी दिएको हो । 

केही समय अघि पुनले मानपदवी कीर्तिमय राष्ट्रदीप द्वितीय श्रेणीको विभूषण लिलामी गर्न सामाजिक सञ्जालमा राखेका थिए। सामाजिक सञ्जालमा राखेको थाहा पाएकाले उक्त पत्र काटिएको मन्त्रालयले जनाएको छ । 

---

‘विभूषण ऐन, २०६४ को दफा २६ (१) बमोजिम कुनै नेपाली नागरिक वा विदेशी व्यक्तिलाई प्रदान गरिएको विभूषण निजले कसैलाई बिक्री गरेमा वा बन्धकीमा राखेमा वा विभूषणको मर्यादाविपरीत हुने गरी विभूषणको प्रयोग गरेमा वा कसैलाई प्रयोग गर्न दिएमा नेपाल सरकारले विभूषण रद्द गर्न सक्नेछ,’ लेखिएको छ,' यहाँ जस्तो प्रतिष्ठित र सम्मानित व्यक्तिबाट  त्यस प्रकारको गैरकानुनी कार्य नहुनेमा मन्त्रालय विश्‍वस्त छ । अतः यहाँलाई उदृृत गरी सम्प्रेषण गरिएको उक्त पोष्टको आधिकारीकता पत्ता लगाउन तपाइको समेत सहयोगको अपेक्षा छ ।'

रद्द गरेसँगै विभूषण पाउने व्यक्तिको नाम र रद्द गरिएको विभूषण समेत खुलाएर सर्वसाधारणको जानकारीका लागि सूचना समेत जारी गर्ने कानुनी व्यवस्था छ ।