मकवानपुरमा पहिरोमा परी एक प्रहरीको मृत्यु

मकवानपुर- मकवानपुरको भिमफेदी गाउँपालिकामा पहिरोमा परी एक जना प्रहरीको मृत्यु भएको छ । भिमफेदी–२, भैंसेमा पहिरोमा परी प्रहरी चौकी भैंसेमा कार्यरत प्रहरी जवान कृतिबहादुर नेपालीको ज्यान गएको हो ।

जाजरकोट जिल्ला, शिवालय नगरपालिका–८ का २२ वर्षीय नेपाली मकवानपुर जिल्ला प्रहरी कार्यालयमा दरबन्दी भई हाल इलाका प्रहरी चौकी भैंसेमा कार्यरत रहेको मकवानपुर प्रहरीले जनाएको छ ।

---

बिहीबार भैंसे चेकपोष्टमा डिउटीमा रहेका नेपाली चिप्लिएर लडी सामान्य घाइते भएका थिए । घाइते नेपालीको हेटौंडा अस्पतालमा उपचार गरी फर्कने क्रममा राति सुख्खा पहिरो खस्दा ढुङ्गाले लागि मोटरसाइकल चालक प्रहरी जवान सुनिल मेचेसहित नेपाली घाइते भएका थिए ।

घाइते नेपाली र मेचेलाई उपचारका लागि हेटौंडा अस्पताल ल्याइएमा उपचारको क्रममा नेपालीको राति नै मृत्यु भएको हो । मोटरसाइकल चालक मेचेको अवस्था भने सामान्य रहेको मकवानपुर प्रहरीले जनाएको छ ।