दाहस्थानमा प्रहरीचौकी !

गलकोट बागलुङ- जनताको सुरक्षामा खटिएका प्रहरी छ महिनादेखि दाहस्थानको सत्तलमा रात बिताइरहेका छन् । जिल्लाको मुख्य प्रवेशद्वार मालढुङ्गा चेकपोष्टमा खटिएका नौ जना प्रहरीको रात अहिले मसान घाटको सत्तलमा बित्ने गरेको छ ।

बागलुङ नगरपालिका–१ मालढुङ्गामा जिल्लामा प्रवेश गर्ने बाक्लो सवारीसाधनको सुरक्षा जाँच तथा सिमानाको संवेदनशिलताको विषयमा यहाँ राखिएका प्रहरीका लागि भवन नहुँदा समस्या भएको हो । जनताको सुरक्षामा खटिएको नेपाल प्रहरी पछिल्लो छ महिनादेखि मसानघाटको सत्तलमा आश्रय लिइरहेको छ ।

---

यहाँको चौकी १५ मिटरभित्रसम्म सडक खाली गर्ने भनी भत्काइएपछि प्रहरीहरु कालीगण्डकी किनाराको खुदर्के मसान घाटको सत्तलमा आश्रय लिएर बस्दै आएका जिल्ला प्रहरी कार्यालयका प्रहरी प्रमुख प्रहरी उपरिक्षक ऋषिराम कँडेलले बताए । जिल्लाको प्रवेशद्वारबाट सडक विस्तारको काम थाल्ने योजना अनुरूप प्रहरी चौकीको अस्थायी छाप्रो भत्काइएपछि प्रहरी मसानघाटमा पुगेको उनले जानकारी दिए ।

यसअघि पनि अस्थायी छाप्रोमा उचित बसोबासको व्यवस्था नहुँदा प्रहरीहरु भुइमा सुत्ने गरेका थिए ।

“जनताको जीउधन र सवारी सुरक्षामा खटिएका प्रहरी मसानखाटको सत्तलमा रात बिताइरहेका छन् । नौ जना प्रहरी अहिले खुदर्के मसानघाटमा बनाइएको सत्तलमा बसेर प्रवेशद्वारको सुरक्षामा खटिएका छन्, मुख्य नाका भएकाले मालढुङ्गामा सवारीसाधनको सबै तथ्याङ्क राखिन्छ”, प्रहरी उपरिक्षक कँडेलले भने, “बागलुङ नगरपालिकासहित स्थानीय तहमा भवन निर्माण गर्न बजेट माग गरेका छौँ, हाल चौकी भइरहेको स्थानभन्दा केही तल भवन बनाउन सकिन्छ ।”

प्रहरी चौकीसँगै सूचना केन्द्र बनाउन आवश्यक रहको भन्दै प्रहरी उपरीक्षक कँडेलले सिमानाका भएकाले प्रहरी थप संवेदनशील हुनुपर्ने अवस्थामा उनीहरु असुरक्षित बस्दै आएका बताए । जिल्लामा सुविधा सम्पन्न प्रहरीका भवन बन्ने क्रम रहे पनि प्रवेशद्वारमा खटिने प्रहरी मसानघाटको सत्तलमा बस्नुपर्ने अवस्था अन्त्य गर्नुपर्नेमा उनले जोड दिए ।

व्यवस्थित प्रहरी चौकी निर्माण गर्न बागलुङका १० पालिकाका साथै प्रदेश र स्थानीय सरकारसँग आर्थिक सहयोगको माग गरिएको जिल्ला प्रहरी कार्यालयका प्रहरी प्रमुख प्रहरी उपरीक्षक कँडेलले जानकारी दिए । “प्रहरी सहायक निरीक्षकको नेतृत्वमा आठ प्रहरी र एक जना ट्राफिक प्रहरी खुदुर्के मसानघाटमा मलामी बस्न बनाइएको भवनमा जस्ताले बारेर बस्दै आउनुभएको छ”, उनले भने ।

 बागलुङ नगरपालिकाले गतवर्ष मालढुङ्गा प्रहरी चौकी निर्माण गर्न रु १५ लाख विनियोजन गरेपनि सडक मापदण्डका कारण भवन बनाउन नसकेपछि बजेट ‘फ्रिज’ भएको थियो । जिल्लाको प्रवेशद्वारमा सुविधा सम्पन्न प्रहरी चौकी आवश्यक रहेको बागलुङ नगरपालिकाका प्रमुख वसन्तकुमार श्रेष्ठले बताए ।

“जिल्लाको मुख्य प्रवेशद्वारमा खटिएका प्रहरीहरुका लागि चौकी र आवास दुवैको समस्या छ, गत वर्ष भवन बनाउन बजेट विनियोजन भएकामा सडकको मापदण्ड टुङ्गो नलाग्दा समस्या भयो । चालु आवमा रु १० लाख विनियोजन गरेका छौँ”, नगरप्रमुख श्रेष्ठले भने, “सिमानाकाको सुरक्षामा खटिएका प्रहरी असुरक्षित भएर बस्नुपर्ने अवस्था छ । जिल्लाका अन्य पालिकाले पनि सहयोग गर्ने प्रतिबद्धता जनाउनुभएको छ, प्रहरीलाई उचित व्यवस्थापन गर्न समन्वय गरी यथाशीघ्र भवन बनाउने छौँ ।”

प्रहरी चौकी मालढुङ्गामा सूचना केन्द्र पनि राख्नु आवश्यक देखिएको जनाउँदै नगरप्रमुख श्रेष्ठले जग्गा अभावले समस्या हुनसक्ने बताए । उनका अनुसार मालढुङ्गा र निसीखोला प्रहरी चौकी जिल्लाको सबैभन्दा दुरवस्थामा रहेका प्रहरी कार्यालय हुन् । -रासस