निषेधाज्ञामा रोकिएका विदेशीलाई असार मसान्तसम्म प्रवेशाज्ञा शुल्कमा छुट

काठमाडौँ : अध्यागमन विभागले कोभिड-१९ तथा निषेधाज्ञाका कारण रोकिएका विदेशी पर्यटकलाई असार मसान्तसम्म प्रवेशाज्ञा शुल्क तथा जरिवानामा छुट दिएको छ । कोभिडको दोस्रो लहरको सङ्क्रमण सुरु भएपछि ७० बढी जिल्लामा निषेधाज्ञा जारी भएकाले नियमित अन्तरराष्ट्रिय उडान बन्द भएपछि नेपालमा रोकिएका विदेशी पर्यटक रोकिएका थिए । 

विभिन्‍न समयमा आएर बसेका विदेशी पर्यटकलाई प्रवेशाज्ञा शुल्कमा छुट दिएको विभागले जनाएको छ । विभागले सूचना जारी गर्दै गत वैशाख १५ गतेसम्म प्रवेशाज्ञाको अवधि भएका पर्यटकका लागि यही असार ३१ गतेभित्र नेपालबाट प्रस्थान हुँदा लाग्‍ने शुल्कमा छुट दिने भएको हो ।

---

'वैशाख १५ गतेसम्म नेपालको वैध प्रवेशाज्ञा भएका र असार ३१ गतेभित्र नेपालबाट प्रस्थान हुने विदेशीको हकमा निजको प्रस्थानका समयमा नै अध्यागमन कार्यालय त्रिभुवन अन्तर्राष्ट्रिय विमानस्थलबाट निःशुल्क प्रवेशाज्ञा नियमित हुनेछ,' सूचनामा उल्लेख गरिएको छ ।

विभागका अनुसार असार २५ गतेदेखि आवेदन गर्ने र आगामी साउन १ गतेदेखि नेपालबाट प्रस्थान गर्ने विदेशीका हकमा नियमानुसार प्रवेशाज्ञा शुल्क, विलम्ब शुल्क र जरिवाना लाग्नेछ । 

प्रचलित अध्यागमन कानूनमा रहेको प्रावधानमा एक प्रवेशाज्ञामा वर्षमा पर्यटकले १५० दिनसम्म बस्न सकिने व्यवस्था रहेको भए पनि निषेधाज्ञाको अवधि गणना नगर्ने साविककै सूचनाअनुसार बस्‍न पाउने अवधि २१० दिन कायम गरिएको छ ।