राहत बोकेर काबुल उड्यो नेपाली टोली
काठमाडौं– अफगानिस्तानलाई मानवीय सहायता प्रदान सामग्री बोकेर नेपाली टोली काबुल प्रस्थान गरेका छन्। परराष्ट्र मन्त्रालयकी सहसचिव तथा प्रवक्ता सेवा लम्सालसहितको नेपाली डेलिगेसन टोली हिमालयन एअरलाइन्सको फला्ईट नं एच ए - ५९३१ बाट काबुल प्रस्थान गरेका हुन् ।
लम्सालको नेतृत्वमा १५ जनाको डेलिगेसन टिममा १७ जना र ९ जना क्रुसहित २६ जनाको टोली उडेका हुन् । उनीहरू त्रिभुवन अन्तरराष्ट्रिय विमानस्थलबाट ठिक ९ः३० बजे उडेका थिए ।
परराष्ट्रमन्त्री नारायण खड्काले त्रिभुवन विमानस्थलमा लम्सालसहितको नेपाली टोलीलाई बिदाइ गरेका थिए । नौ हजार ७ सय १५ किलो खाना, लत्ताकपडासहितको राहत सामग्री बोकेर टोली अफगानिस्तानतर्फ लागेको हो ।
काबुलमा नेपाली टोलीले त्यहाँस्थित संयुक्त राष्ट्रसंघको कार्यालयलाई सहायता सामाग्री हस्तान्तरण गर्ने भएको छ । टोली आजै राती स्वदेश फर्कनेछ ।
मानवीय संकटसँग जुधिरहेको अफगानिस्तानलाई सहायता गर्न राष्ट्रसंघीय महासचिव एन्टोनियो गुटरेसले आग्रह गरेका थिए। तालिबानले सत्ता कब्जा गरेपछि अफगानिस्तानमा अन्तर्राष्ट्रिय सहायता रोकिएको छ। सोकारण अफगानिस्तानमा संकट पैदा भएको हो । केही महिनाअघि तालिबानले सत्ता कब्जा गरेको मुलुक अफगानिस्तानमा मानवीय संकट उत्पन्न भएपछि नेपालले सहयोग गरेको हो।
आर्थिक संकट र खाद्यान्न अभावबाट गुज्रिरहेको अफगानिस्तानलाई नेपालले सहयोग गरेको परराष्ट्र मन्त्री डा. नारायण खड्काले बताए । नेपालसँगै अफगानिस्तानलाई अन्य मुलुकले पनि सहयोग गरिरहेका छन्।
राष्ट्रसंघले अफगानिस्तानलाई ४.४ बिलियन डलर बराबरको सहायता आवश्यक भएको जनाएको छ । नेपाल उद्योग वाणिज्य महासंघ, चेम्बर अफ कमर्सलगायत निजी क्षेत्र र व्यवसायीको पहलमा नेपालले सहायता सामाग्री जुटाएको हो ।
नेपालले इतिहासमा पहिलोपटक संकटमा परेको मित्रराष्ट्रलाई सघाएको मन्त्री खड्काले बताए। त्यहाँको कूल जनसंख्यामध्ये २ करोड ७० लाख जनसंख्या मानवीय सहायताको पर्खाइमा छन्।
कमेन्ट गर्नुहोस्
Sign in with
Facebook Googleकमेन्ट पढ्नुहोस्
0 प्रतिकृया