कोभिड-१९ महामारीकै बीचमा खाडी फर्कन थाले नेपाली

काठमाडौं : कोभिड-१९ को महामारीको बीचमा पनि खाडी मुलुकमा नेपाली कामदारको माग हुन थालेको छ । खाडी किङको रुपमा चिनिएको साउदी अरेवियाले विदामा नेपाल आएकालाई पुनः काममा बोलाउन थालेको छ । युएई, कतार, कुवेत, ओमान, बहराइन लगायतले पनि नेपाल फर्केकालाई फिर्ता बोलाइरहेका छन । कतिपय नेपालीहरू त्यसतर्फ जान थाली सकेका छन । हप्तामा चार सयको हारहारीमा फर्कन थालेका छन् ।

उडानको समय मिलाएर आफ्नो भिसा भएकाहरु विदामा आएकाहरु पीसीआर परीक्षण गरेर त्यसतर्फ गइरहेका छन् । उडान भएका र श्रम स्विकृत पाएका विदामा रहेकाहरु त्यसतर्फ गइरहेका छन् । ति मुलुकको नयाँ कामदार नखुलाए पनि पुराना आफ्ना कामदारलाई भने फिर्ता बोलाउन थालेका छन् । अन्य विदेशी जनशक्ति भन्दा पहिलो रोजाईमा नेपाली पर्दै नेपालीलाई फिर्ता बोलाउन थालेका हुन् । ‘नयाँ कामदार लिएका छैनन । तर पुराना विदामा गएकाहरूलाई भने बोलाउन थालेका छन् । कतिपय घर जाने भन्नेहरू पनि काममा फर्केका छन्,’साउदी अरेवियाका लागि नेपाली राजदूत प्राध्यापक महेन्द्र पी. सिंहले इकागजसँग भने, ‘यहाँ कामहरु सुचारू हुन थालेका छन् ।’

---

महामारीको बीचमा साउदी अरेवियाबाट मात्रै १८ हजार नेपाली स्वदेश फर्केका थिए । ति फर्केका र पहिले नै छुट्टीमा आएका नेपालीहरु कामदारहरू पुनः साउदी अरव फर्कन थालेको राजदूत सिंहले बताए । ‘आएकाहरू पीसीआरु टेस्ट गरेर आएकाहरू एक साता क्‍वारेन्टाइनमा बसेर काममा जाने गर्दछन्,’ उनले भने, ‘विस्तारै आव नयाँको लागि पनि काम खुला हुनेछ ।’

तीन लाख बढि कामदार साउदी अरेवियामा छन् । त्यस्तै अन्य मुलुक कतार, युएईमा पनि साउदी अरेवियाको हाराहारी छ । त्यस्तै अन्य मुलुक कुवेत, ओमान र बहराइनमा पनि नेपालीहरु उल्लेख्य छन् । ति सबै मुलुकहरुले नेपालीलाई विदाबाट फर्काउन लागेका छन् । त्यहाँ नियमित उडान पनि आरम्भ भएको छ । जसले गर्दा यहाँबाट श्रम स्विकृत लिएकाहरु फर्कन सक्नेछन् ।

आरम्भमा सरकारले त्यहाँबाट स्वदेश फर्कन चाहेकालाई फिर्ता नल्याएपनि त्यही मुलुकमा सरकारको विरोध गर्न थालेका थिए । दूतावास पनि घेरेका थिए । उनीहरु सरकारको चार्टर उडान तर आफ्नो खर्चमा फर्केका थिए । त्यसरी फर्केका र पहिले नै फर्केकाहरू पनि अहिले पुनः काममा जान थालेका हुन् । राजदूतहरुले अव ति मुलुकमा नयाँलाई पनि अवसर दिन पर्ने भन्दै कामदार खुलाउन पहल गरेका छन ।