युरोकपमा वेल्स र स्वीट्जरल्यान्डको बराबरी

काठमाडौँ : युरोकप फुटबलमा वेल्स र स्वीट्जरल्यान्डले बराबरी खेलेका छन् । शनिबार राती भएको खेलमा दुवै टिमले १-१ गोलको बराबरी खेलेका हुन् ।

बाकु ओलेम्कि स्टेडियममा पहिलो हाफ बराबरीमा सकिएको थियो । दोस्रो हाफको सुरुमै स्वीट्जरल्यान्डले अग्रता लियो । उसका लागि ४९ औँ मिनेटमा ब्रील इम्बोलोले गोल गर्दै टिमलाई अग्रता दिलाएका थिए ।

---

तर वेल्सले त्यो अग्रता धेरैबेर टिक्न दिएन । केईफिर मूरेले ७४ औँ मिनेटमा वेल्सका लागि बराबरी गोल फर्काए । खेलको अन्त्यतिर स्वीटजरल्यान्डले गोल गरेपनि त्यो अफसाइड भएकाले रेफ्रीले मान्यता दिएनन् ।

यो खेलमा धेरैको नजर स्टार स्ट्राइकर ग्यारेथ बेल र जार्दन शाकिरीमा थियो । तर दुवैले केही प्रहार गरेपनि गोल गर्न सकेनन् । बराबरीसँगै दुवै टिमले अंक बाँडेका छन् । यसअघि उद्घाटन खेलमा इटालीले टर्कीलाई हराउँदै विजयी सुरुवात गरेको थियो । अर्को खेलमा डेनमार्क र फिनल्यान्ड खेलिरहेका छन् ।