प्रथम प्रदेशस्तरीय भलिबल प्रतियोगिताको उपाधि डोटीले जित्यो

धनगढी - धनगढीमा जारी प्रथम प्रदेश स्तरीय पुरुष भलिबल प्रतियोगिताको उपाधि डोटीले जितेको छ । शनिबार भएको फाइनल खेलमा डडेल्धुरालाई ३–० को सोझो सेटमा पराजित गर्दै डोटीले उपाधि चुमेको हो ।  पहिलो सेट २५–२२ ले जितेको डोटीले दोश्रो सेट सजिलै २५–१३ ले जितेको थियो । त्यस्तै अन्तिम सेट १७–१७ को बराबरी पछि पनि डडेल्धुरा लयमा नफर्कदा डोटीले २५–२१ सजिलै उपाधि माथी कब्जा जमाउन सफल रह्यो ।

उपाधिसंगै डोटीले नगद एक लाख र ट्रफी प्राप्त गरेको छ । त्यस्तै प्रतियोगिताको उपविजेता बनेको डडेल्धुराले नगद ५० हजार र ट्रफीमा चित्त बुझाएको छ ।प्रतियोगिताको सेमिफाइनलसम्म पुग्ने दुई टिम कैलाली र कंचनपुरले २५–२५ हजार नगदसहित ट्रफी प्राप्त गरेका छन ।

---

सुदूरपश्चिम प्रदेश खेलकुद परिषद्को आयोजनामा प्रतियोगिताको समापन समारोहका प्रमुख अतिथि सामाजिक विकासमन्त्री लाल बहादुर खड्काले विजयी टिमलाई पुरस्कार तथा ट्रफी वितरण गरेका थिए । प्रतियोगिता यही असोज २०(२३ गतेदेखि धनगढीस्थित रंगशालामा शुरु भएको थियो ।