आर्थिक क्रान्तिको लागि पर्यटन : मुख्यमन्त्री राई

इलाम - एक नम्बर प्रदेशका मुख्यमन्त्री राजेन्द्र राईले आर्थिक क्रान्तिलाई पुरा गर्नको पर्यटन प्रवर्द्धन मुख्य भएको बताएका छन् । इलामको माई नगरपालिका–१ मा बिहीबारबाट सुरु भएको चार दिने तेह्रकुने महोत्सवको उद्घाटन गर्दै मुख्यमन्त्री राईले पर्यटकीय क्षेत्रको संरक्षण र प्रचार प्रसार आवश्यक रहेको बताए । 

उनले तेह्रकुने सिमसार क्षेत्रको विकास र संरक्षणको लागि प्रदेश सरकारले उचित ध्यान दिने बताए । चुरे क्षेत्रमा रहेको तेह्रकुने पोखरीको प्रचार प्रसारको लागि चार दिने महोत्सव आयोजना गरिएको हो । प्रदेश सांसद काजीमान कागतले, नगरपालिका प्रमुख दीपक थेबे लगायतका बत्ताले सिमसार क्षेत्रको विस्तृत परियोजना प्रतिवेदन अनुसारको काम अघि बढाउनुपर्नेमा जोड दिए ।

---

महोत्सवको अवसर पारेर पोखरीमा दुई वटा डुंगा सयरको व्यवस्था गरिएको छ । महोत्सवको उद्घाटन कार्यक्रममा राई, लिम्बु, सुनुवार र उराउ जातिको सांस्कृतिक झाकी प्रदर्शन गरिएको छ । मुख्यमन्त्री राईले सांस्कृतिक बाजा च्याब्रुङ बजाएर महोत्सवको उद्घाटन गरेका हुन् । चार दिने महोत्सवमा स्थानीय जातजातिको झाकी र भलिबल प्रतियोगिता आयोजना गरिएको छ । 

त्यस्तै प्रत्येक दिन साङ्गीतिक कार्यक्रम हुने हुनेछन् । स्थानीय उत्पादनको प्रवर्द्धन गर्ने उद्देश्य राखिएको महोत्सवमा सिस्नोका विभिन्न परिकार, वाचिपा (मासुको परिकार), ढिँडो, गुन्द्रुकको अचार जस्ता परिकारको व्यवस्था गरिएको छ । 

सामुन्द्रिक सतहबाट पाँच सय मिटरको फिटको उचाइमा रहेको तेह्रकुने सिमसार  क्षेत्रको झापाबाट नजिकैको दुरीमा पर्ने भएकाले पर्यटकको रोजाइमा पर्न सक्छ । चुरे क्षेत्रमा रहेको तेह्रकुने पोखरी पर्यापर्यटनको दृष्टिले महत्त्वपूर्ण मानिन्छ । 

स्थानीयको अग्रसरतामा राष्ट्रपति चुरे संरक्षण कार्यक्रम, वन मन्त्रालय र जलाधार व्यवस्थापन कार्यालयले पोखरीको संरक्षणमा लगानी गरेका छन् । ३५ रोपनी जग्गामा फैलिएको पोखरी चुरे क्षेत्रका लागि रिचार्ज टङ्कीको रूपमा काम गर्न सक्छ । 

सिमसार क्षेत्रमा बालबालिका देखि बृद्धबद्धासम्मको लागि छुट्टाछुट्टै उद्यान बनाउने, आकाशे पुल, भ्यु टावर र पोखरीलाई सिंगार्ने योजना छन् । चार दिने महोत्सवमा १६ देखि २० हजारसम्म पर्यटक भित्र्याउने आयोजकको लक्ष्य छ ।