काठमाडौँ : नेपाल वायुसेवा निगमका दुई वटा जहाज ग्राउण्डेड भएका छन् । काठमाडौँबाट जापानको नारिता उड्न लागेको वाइडबडी जहाज ‘इलेक्ट्रिक’ समस्याका कारण काठमाडौँमै रोकिएको छ । अर्को कतारको दोहाबाट दुबई हुँदै काठमाडौँ आउन लागेको न्यारोबडी विमान दोहामै ग्राउण्डेड भएको छ ।

काठमाडौँको त्रिभुवन अन्तराष्ट्रिय विमानस्थलबाट जापानको नारिता उड्न लागेको नाइन एन ए वाई वाइडबडी जहाजमा प्राविधिक समस्या देखिएपछि ग्राउण्डेड भएको स्रोतले जनाएको छ । यस्तै दोहाबाट काठमाडौँ आउन लागेको नाइन एन वाई के न्यारोबडीमा पनि प्राविधिक समस्याका कारण ग्राउण्डेड भएको हो । 

---

दुवै जहाज उड्ने तरखरमा रहेका बेला प्राविधिक समस्या देखिएपछि ग्राउण्डेड भएका नेपाल वायुसेवा निगम स्रोतले जनाएको छ । 

नारिता उड्न लागेका विमानमा ११० जना यात्रुले टिकट काटेर तयारी अवस्थामा रहँदा विमानमा प्राविधिक समस्या देखिएको हो । राती ११ बजे वाइडबडी नारिता उड्ने कार्यतालिका थियो । तर प्राविधिक समस्याका कारण विमान ग्राउण्डेड भएपछि यात्रुलाई होटलमा राखिएको छ । यस्तै दोहाबाट काठमाडौँ आउन लागेको विमानको इन्जिन ‘थर्किन’ थालेपछि निर्धारित समयमा उडाउन नसकिने भनेर ग्राउण्डेड भएको स्रोतले जनाएको छ । 

दोहाबाट काठमाडौँ आउन लागेको न्यारोबडीमा १९० जना यात्रुले बोर्डिङ पास लिइसकेका स्रोतले जनाएको छ । तर जहाजमा प्राविधिक समस्या देखिएपछि उनीहरुलाई विमानस्थलबाट होटलमा फर्काइएको छ । दोहाबाट न्यारोबडी जहाज मंगलबार राती १०ः५० बजे काठमाडौँका लागि उड्ने कार्यतालिका थियो । 

मंगलबार बिहान मात्रै १५० जना यात्रु लिएर न्यारोबडी काठमाडौँबाट दोहामा अवतरण भएको थियो । तर विमानमा समस्या देखिएपछि बोर्डिङ पास लिइसकेका यात्रुलाई होटलमा राख्नुपर्दा निगमलाई आर्थिक भार थपिएको छ । 

दुवै जहाज ग्राउण्डेड भएपछि टिकट लिइसकेका यात्रुलाई होटलमा राख्दा आर्थिक भार थपिएको छ भने जहाज अब कहिले उड्छ भन्ने एकिन नभएकाले निगम पदाधिकारीलाई तनाव बढेको छ ।