सडक महोत्सवको तयारी पुरा, दर्शकलाई खोप

पोखरा- पोखरा सडक महोत्सवको २३ औं संस्करणको सडक महोत्सवको तयारी पुरा भएको छ । रेष्टुरेष्ट एण्ड बार एसोसियसन (रेबान) पोखराको आयोजनामा हुने महोत्सव तयारी पुरा भएको आयोजकले पत्रकार सम्मेलन गरी जानकारी दिएको छ । 

सडक महोत्सवको २३ औं संस्करणको पुस १५ देखि १७ सम्म हुँदैछ । सधैं ५ दिन चल्ने महोत्सव कोरोनाका कारण गत वर्ष देखि छोट्याईएको हो । पोखरालाई ‘अंग्रेजी नयाँ वर्षको गन्तव्यस्थल’ का रुपमा प्रवद्र्धन गर्ने उद्देश्यले महोत्सव गर्न लागिएको हो । 

---

महोत्सवका संयोजक नरेश भट्टराईले कोभिड–१९ को संक्रमणको जोखिमलाई दृष्टिगत गरी स्वास्थ्य मापदण्डलाई ख्याल गर्दै महोत्सव आयोजना गरिने बताए । महोत्सवको उद्घााटन कार्यक्रममा २५ भन्दा बढी बाजागाजा सहित साँस्कृतिक समूहको सहभागिता रहने महोत्सव संयोजक भट्टराईले जानकारी दिए । 

उनका अनुुसार महोत्सव स्थलमा ३० भन्दा बढी हस्तकलाको स्टल रहनेछ । महोत्सवमा कोमागाने पार्कभित्र हुने कार्यक्रमका लागि दिउँसोको लागि ५० रुपैयाँ र बेलुका कन्सर्टको लागि १ सय रुपैयाँ प्रवेश शुल्क तोकिएको उनले जानकारी दिए । 

महोत्सव उद्घाटन नेपाल सरकारका गृहमन्त्री खाँडले गर्ने कार्यक्रम तय भएको पोखरा पर्यटन परिषद्का अध्यक्ष गोपीबहादुर भट्टराईले जानकारी दिए । दिउँसो १ बजे कोमागाने पार्क लेकसाइडमा गृहमन्त्री खाँडले सडक महोत्सवको उदघाटन गर्नेछन् ।

महोत्सवमा राष्ट्रिय तथा अन्तर्राष्ट्रिय खानाको प्रदर्शन, दोहोरी प्रतियोगिता, झाँकी प्रदर्शन, रात्रीकालिन कन्सर्ट, डुङ्गा दौड, ह्वीलचियर दौड, वेटर रेस, टग अफ वार जस्ता प्रतियोगिता गर्ने भएको छ । महोत्सव अवलोकनमा जानेहरुको सहजताका लागि रात्रिकालिन बस सेवाको पनि व्यवस्था गर्ने आयोजकले जनाएको छ । 

यसपटकको महोत्सवमा पनि अघिल्लो पटकको जस्तै हेल्थ प्रोटोकललाई विशेष ध्यानमा राखिने छ । यसका लागि विभिन्न स्थानमा हेल्थ डेष्क, मास्क तथा स्यानिटाइजर जस्ता सुरक्षाका उपायहरु अपनाइने संयोजक भट्टराईले जानकारी दिए । 

महोत्सव हेर्न आउनेलाई कोरोना विरुद्धको खोप
पोखरा सडक महोत्सव अवलोकन गर्न आउने महानुभावहरुलाई कोभिड विरुद्धको जोनसेन एण्ड जोनसेन खोप उपलव्ध गराइने भएको छ । 

आयोजक रेबान पोखराले महोत्सव अवलोकन गर्न आउनेको इच्छा अनुसार खोप उपलब्ध गराइने संयोजक रेबान पोखराका अध्यक्ष लक्ष्मण बरालले जानकारी दिए । 

बरालका अनुसार उद्घाटनका दिन र शुक्रबार ११ बजेदेखि ४ बजेसम्म स्ट्रीट नम्वर ५ मा खोप उपलब्ध गराइनेछ ।