काेभिड संक्रमणका बेला प्राधिकरणको कमाइ कति ?

काठमाडाैँ - कोरोना–१९ महामारीका कारण मुलुकको आर्थिक र सामाजिक क्षेत्रमा असर पर्‍यो । विशेषगरी अर्थतन्त्रको महत्वपूर्ण आधारमध्येको पर्यटन क्षेत्रमा त नराम्रो असर पर्‍यो ।

पर्यटन क्षेत्रमा पनि सबैभन्दा बढी एयरलाइन्स र होटल क्षेत्र प्रताडित भए पनि नेपाल नागरिक उड्डयन प्राधिकरणले भने मुनामा कमाएको छ । प्राधिकरणको वार्षिक प्रगति प्रतिवेदनअनुसार आव २०७७/७८ मा प्राधिकरणको आय विमानस्थल विकास शुल्कबाहेक दुई अर्ब सात करोड ३२ लाख रुपैयाँ प्रक्षेपण गरिएकामा ५७ करोड ४५ लाख रुपैयाँ अर्थात् २७दशमलव७१ प्रतिशतले बढ्न गई दुई अर्ब ६४ करोड ७७ लाख रुपैयाँ आम्दानी भएको छ । 

---

त्यसैगरी विमानस्थल विकास शुल्कतर्फ ६० करोड २८ लाख रुपैयाँ प्रक्षेपण गरिएकामा यथार्थमा २९ करोड ३२ लाख रुपैयाँ अर्थात् ४८दशमलव ६४ प्रतिशतले घट्न गई ३० करोड ९६ लाख रुपैयाँ आम्दानी भएको छ ।

आव २०७५/७६ मा रु नौ अर्ब एक करोड १८ लाख रहेको प्राधिकरणको कुल आम्दानी कोरोनाको असरले गर्दा आव २०७६/७७ मा करिब २९ प्रतिशतले घट्न गई ६ अर्ब ३७ करोड ४९ लाख पुगेको छ । आव २०७७/७८ को कुल आम्दानी आव २०७५/७६ को तुलनामा करिब ६७ प्रतिशतले न्यून अर्थात् दुई अर्ब ९५ करोड ७३ लाख रुपैयाँ पुगेको छ ।
    
आव २०७७/७८ मा प्राधिकरणको पुँजीगत खर्चतर्फ रु ३० हजार ६४ करोड ४८ लाख, कार्य सञ्चालनमा तीन अर्ब ५६ करोड ६० लाख रुपैयाँ, आयकर तथा अन्य खर्च  ६ अर्ब ८९ करोड ९५ लाख गरी जम्मा ४१ अर्ब ११ करोड तीन लाख रुपैयाँ व्यय अनुमान गरिएकामा पुँजीगत खर्च ११ अर्ब ३६ करोड २८ लाख रुपैयाँ, कार्यालय सञ्चालन खर्च दुई अर्ब ७५ करोड ९२ लाख र आयकर तथा अन्य खर्च दुई अर्ब ७० करोड १८ लाख गरी जम्मा १६ अर्ब ८२ करोड ४८ लाख रुपैयाँ खर्च भएको छ ।
    
चालू आव का लागि पुँजीगत खर्चतर्फ ३२ अर्ब तीन करोड ५५ लाख र कार्य सञ्चालनतर्फ रु चार अर्ब १० करोड ८४ लाख गरी जम्मा ३६ अर्ब १४ करोड ३९ लाख रुपैयाँ विनियोजन गरिएको छ । यस अतिरिक्त नेपाल सरकारलाई मू.अ.कर भुक्तानी दुई अर्ब ९२ करोड २३ लाख रुपैयाँ, लाभांश भुक्तानी ५२ करोड ३५ लाख रुपैयाँ, साँवा ब्याज भुक्तानी ६६ करोड ४६ लाख रुपैयाँ, प्रशासकीय पुनरावलोकन तथा पुनरावेदनको लागि ४० करोड रुपैयाँ, कर्मचारी अवकास कोष तथा अन्य भुक्तानीको लागि ११ करोड ५६ लाख रुपैयाँ, कर्मचारी लाभांश र स्थीर सम्पत्ति प्रतिस्थापनका लागि दुई अर्ब २२ करोड रुपैयाँ विनियोजन गरिएको प्राधिकरणले जनाएको छ ।
    
चालू आर्थिक वर्ष २०७८/७९ को स्रोततर्फ नियमित आम्दानी पाँच अर्ब ५९ करोड २९ लाख रुपैयाँ, विमानस्थल विकास शुल्क ७९ करोड एवं ऋण, सेयर तथा अनुदानबाट २१ अर्ब ३४ करोड ३५ लाख गरी जम्मा २७ अर्ब ७२ करोड ६४ लाख रुपैयाँ हुने अनुमान गरिएको छ । विसं २०७८/७९ मा प्राधिकरणको कुल बजेट ४३ ४३ अर्ब ६७ करोड ७७ लाख रुपैयाँ रहेको छ । प्राधिकरणको आव २०७६/७७ सम्मको कुल सञ्चित नाफा १६ अर्ब एक करोड २० लाख रुपैयाँ रहेको छ । रासस