विश्व

बर्मामा मारिनेको संख्या ५६८ पुग्यो,  सैन्य दमनको क्रुर रूप

इकागज |
चैत २५, २०७७ १६:३७ बजे

फाइल तस्बिर

काठमाडौँ : राष्ट्रसंघीय मानव अधिकार आयोगले बर्मामा जारी सैन्य सरकारको दमनबाट ५ सय ६८ नागरिकले  ज्यान गुमाउन परेको जनाएको छ । गत फेब्रुअरी १ मा निर्वाचित सरकारलाई अपदस्थ गरेर सेनाले शासन सत्ता लिएपछि युवाहरू सडकमा उत्रेर जुन्ता शासकको विराेध गरिरहेका छन् । 

संयुक्त राष्ट्रसंघ महासचिवको कार्यालयबाट जारी गरेको विज्ञप्तिमा यो साता मात्र १८ जनताले ज्यान गुमाएको उल्लेख छ । बर्माको सैन्य जुन्ता सरकारले हिंसालाई अझ बढाउँदै लगेको पनि उल्लेख छ।  

यो अवधिमा अधिकांश कलिला युवाको ज्यान गएको छ । बर्मामा निर्वाचित सरकार संसदबाट अनुमोदित हुने दिन सेनाले ‘कू’ गरेर शासन सत्ता पुनः आफ्नो हातमा लिएको थियो । सेनाले प्रजातन्त्रवादी नेता आङ सान सूकीलाई नजरबन्दमा राखेको छ । जुन्ता शासकले हिरासतमा नै आफ्ना नागरिकको हत्या गरेको छ ।

बर्माको म्यात चे सहरमा आन्दोलनका क्रममा पक्राउ परेका दुई आन्दोलनकारी प्रहरी हिरासतमा नै मारिएकाे पनि उल्लेख गरिएको छ । पक्राउ परेको भोलिपल्ट उनीहरूलाई पाकोकु सैन्य अस्पतालमा छोडिएको भए पनि रिपोर्ट आउँदा चारमध्ये दुई जनाको निधन भइसकेको थियो। बर्मेली शासककाे क्रुर रूप प्रदर्शन गरेकाे पनि राष्ट्रसंघको धारणा छ । 

तर, अझै पनि बर्मा सैन्य ‘कू’ को विरोध हुन छोडेको छैन भने सरकारले पनि प्रदर्शनकारीको हत्या गर्न छाडेको छैन । ‘कू’ भएयता ५ सय ५६ प्रदर्शनकारीको त गोली लागेर नै ज्यान गएको उल्लेख भने अन्य भने सैन्य हिरासत र पिटाईको कारण ज्यान गुमेको छ। 

राजधानी नेपिडो, रंगुन र माण्डलेलगायत शहरमा सुरक्षाकर्मीले बर्बर दमन गरिरहेका छन्। सैन्य शासन ‘जुन्ता’को चरम दमन हुँदाहुँदै हजारौं बर्मेलीहरू स्वस्फूर्त सडकमा उत्रेका छन् । जुन्ता शासकले आफ्नै नागरिकलाई हवाई आक्रमण समेत गरेका छन् । आम नागरिक ओडारमा बस्‍न पर्ने बाध्यता समेत निम्त्याईदिएका छन् कैयन नागरिक घर छाडेर ओडारमा बसेका छन् । कैयन मानिसहरू  छिमेकी मुलुक थाइल्याण्ड समेत गइरहेका छन् । 



Author

थप समाचार