नेपाली नयाँ वर्ष : छिमेकीले बिर्सिए, अमेरिका र अस्ट्रेलियाले सम्‍झिए

काठमाडौँ : अमेरिकी राष्ट्रपति जो बाइडन र अस्ट्रेलियन प्रधानमन्त्री स्कट मरिसनले नेपाली नयाँ वर्षको शुभकामना दिएका छन् । अमेरिकी राष्ट्रपतिले आफ्नो ट्‌वीटमार्फत शुभकामना दिएका छन् भने अस्ट्रेलियन प्रधानमन्त्रीले विज्ञप्ति नै जारी गरेर नेपाली नयाँ वर्षको शुभकामना दिएका हुन् । बेलायती, क्यानडियन प्रधानमन्त्रीले पनि शुभकामना दिने गरेको भए पनि यसपटक उनीहरूले शिख समुदायको बैशाखीको शुभकामना मात्र दिएका छन् ।

 

---

Jill and I send our warmest wishes to the South Asian and Southeast Asian communities who are celebrating Vaisakhi, Navratri, Songkran, and the incoming New Year this week. Happy Bengali, Cambodian, Lao, Myanmarese, Nepali, Sinhalese, Tamil, Thai, and Vishu New Year!

— President Biden (@POTUS) April 13, 2021

उनीहरूले नयाँ वर्ष २०७८ को अवसरमा नेपालीहरूलाई शुभकामना दिँदै सुस्वास्थ्य र दिर्घायूको कामना गरेका छन् । उनले प्रथम महिला जिल बाइडेन र आफ्नो तर्फबाट शुभेच्छा प्रकट गर्दै यो साताभर विभिन्‍न आप्रवासी समुदायमा मनाइने नयाँ वर्षको कामना गरेका हुन् । उनले वैशाखी, नवरात्री, संक्राङलगायत नयाँ वर्ष मनाउनेमा शुभकामना व्यक्त गरेका छन् ।

बाइडनले नेपालीलगायत बंगाली, कम्बोडियन, लाओ, म्यानमारिज, सिहालिज, तमिल, थाई र विसुलाई नयाँ वर्षको समेत शुभकामना दिएका हुन् । नेपालीहरुले मनाउने वैशाख १ गतेको दिनमा विभिन्‍न समुदायले पनि नयाँ वर्ष मनाउने गर्छन् । थाइहरूले नयाँ वर्षको रुपमा संक्राङ मनाउँछन् भने शिख समुदायले वैशाखी मनाउँदै आएका छन् ।

अस्ट्रेलियाली प्रधानमन्त्री मरिसनले पनि नेपाली नयाँ वर्ष २०७८ को उपलक्ष्यमा विक्रम संवतको नयाँ वर्षलाई विश्वभर छरिएर रहेका नेपालीले सामूहिक उत्सव मनाउने दिनको रुपमा व्याख्या गर्दै शुभकामना दिएका छन्  । उनको सचिवालयले एक विज्ञप्ति नै जारी गर्दै शुभकामना दिएका हुन् । अस्ट्रेलियामा बढ्दै गएको नेपाली समुदायको प्रभाव र उपस्थितिले महत्त्वपूर्ण स्थान पाएको रूपमा समेत व्याख्या गरेका छन्  ।

नेपाली समुदायले अस्ट्रेलियालाई बहुसांस्कृतिक मुलुकको रुपमा चिनाउन निरन्तर योगदान गरिरहेको पनि उल्लेख छ । यो पुरानो संवतको हरेक नयाँ वर्षमा नयाँ उर्जा दिने समेत उनले बताएका छन् । बेलायतमा नेपाली समुदाय गोर्खा छ । त्यहाँ अध्ययन गर्न जाने नेपाली समुदाय पनि ठूलो छ । तर, उनीहरु नेपाली विक्रम संवत अनुसार मनाइने अन्य पक्षलाई सम्झे पनि विक्रम संवतलाई भने सम्झेका छैनन् । त्यहाँ रहेको दूतावासले यस्ता विषयमा सम्बन्धित मुलुकलाई घचघच्याउन आवश्यक छ । क्यानडामा पनि नेपाली समुदाय बढ्दो छ तर त्यहाँ पनि शुभकामना दिइएको छैन् । शुभकामना सम्बन्धको संकेत पनि हो ।

भारतीय प्रधानमन्त्री नरेन्द्र मोदीले नयाँ वर्ष २०७८ को शुभकामना दिएका छैनन् । उनले अन्य मुलुकलाई शुभकामना दिए पनि छिमेकको नयाँ वर्ष भुलेको झै देखिन्छ । यो समाचार तयार पार्दासम्म उनको शुभकामना आएको छैन् । यहाँस्थित भारतीय दूतावासले पनि शुभकामना दिएका देखिँदैन ।

चिनियाँ राजदूत होउ यान्छीले पनि नयाँ वर्ष २०७८ को शुभकामना दिएकी छन् । ‘नयाँ वर्ष प्रारम्भको यस सन्दर्भमा नेपालका लागि चिनियाँ  राजदूतावासको तर्फबाट म सबै नेपाली साथीहरूमा स्वस्थ, सुख, शान्ति तथा समुन्‍नतिको मंगलमय शभकामना व्यक्त गर्दछु,’ उनले ट्‌वीटमा लेखेकी छन् ।