भारतमा कोभिड–१९ महामारी फैलिएपछि धेरै देशले रोके हवाइ उडान

काठमाडौँ : भारतमा कोरोना भाइरस महामारीको दोस्रो लहर देखिएपछि धेरै देशहरूले भारतको उडान बन्द गरेका छन् । क्यानडा, बेलायत, फ्रान्स, अष्ट्रेलिया, हङकङ, संयुक्त अरब, सिंगापुर, न्यूजील्याण्ड लगायतका मुलुकले भारतमा उडान रोकेका छन् । तर अमेरिकाको युनाइटेड एयरलाइन्सले भने आजदेखि पुनः उडान सुचारु गर्ने भएको छ । अमेरिकाको युनाइटेड एयरलाइन्सले नेवार्क, सन फ्रान्सिस्को, सिकागोबाट सीधा दिल्ली उडान गरिरहेको छ । अमेरिकाको सेन्टर फर डिजिज कन्ट्रोल एण्ड प्रिभेन्सन (सीडीसी) ले भारतमा कोभिड–१९ संक्रमणको दोस्रो लहर उच्च गतिमा फैलिरहेको भन्दै अमेरिकीहरूलाई भारतीयहरूले पूर्ण रूपमा खोप नलगाएसम्म यात्रा नगर्न भनेको थियो । 

चालक दलको पीसीआर/एण्टीजिन परिक्षण लगायतका विषयमा द्विविधा हुँदा बिहीबार बेलुका न्यूयोर्क (नेवार्क) बाट दिल्ली आएको फ्लाइट युए ८०१का चालक दलले कोभिड–१९ परिक्षणमा असहमति राख्दै दिल्लीबाट यात्रु नै नलिइ न्यूयोर्क फर्केको थियो । युनाइटेड एयरलाइन्सले यो द्विविधा अन्त्य भएको भन्दै आजदेखि पुनः उडान सुचारु हुने उल्लेख गरेको छ । 

---

यसका अतिरिक्त क्यानडाले भने भारत र पाकिस्तान दुवै मुलुकतर्फ/बाट उडान रोकेको छ । फ्रान्सले हवाइ उडान रोकेपनि भारत भएर यात्रा गर्दै उसको देशमा पुगेका नागरिकलाई १० दिनको क्वारेन्टीन अनिवार्य गरेको छ । हङकङले भने अप्रिल १९ देखि नै भारतमा उडान रोकेको हो । हङकङले भारतका अतिरिक्त फिलिपिन्स र पाकिस्तानमा पनि अप्रिल २० देखि मे ३ सम्म १४ दिन उडान स्थगित गरेको जनाएको छ । 

अष्ट्रेलियाले भारतसँगका एक तिहाइ उडानहरू कटौती गरेको छ । अष्ट्रेलिया सरकारले बाहिरबाट यात्रा गरेर उसको मुलुकमा आउनेलाई १४ दिन क्वारेन्टीन अनिवार्य गरेको छ र यसमा ४० प्रतिशत कोभिड–१९ केसहरू भारतबाट आएकाहरूमा हुने गरेको उल्लेख गरेको छ । इण्डोनेसियाले भारतीयहरूका अतिरिक्त पछिल्लो १४ दिनमा भारतमा रहेका विदेशीहरूलाई पनि प्रवेशाज्ञा (भीसा) नदिने भएको छ । न्यूजील्याण्डले आफ्ना नागरिक बाहेक भारत लगायत कोभिड–१९ को दोस्रो लहर देखिएका मुलुकका नागरिकलाई न्यूजील्याण्ड प्रवेशमा प्रतिबन्ध गरेको छ । अप्रिल २८ देखि भने न्यूजील्याण्डले थप कडा कदम चाल्ने बताइएको छ । 

सिंगापुरले आफ्ना नागरिकबाहेक भारतबाट यात्रा गर्ने सबै गैरआवासीयहरूलाई अप्रिल २३ देखि नै प्रवेशमा रोक लगाएको छ । संयुक्त अरब इमिरेट्सले आजदेखि १० दिनका लागि भारतसँगका सबै उडान बन्द गरेको छ । बेलायतले पनि अप्रिल २३ देखि नै भारतसँगका उडान बन्द गरेको हो । बेलायती नागरिकलाई भने आफ्नो मुलुकमा प्रवेश अनुमति दिइएको छ । बेलायतमा १० दिन क्वारेन्टीन बस्न एक हजार सात सय ५० पाउण्ड खर्च हुन्छ । बेलायत आउनुअघि पछिल्लो १० दिनदेखि भारतमा रहेकालाई पूर्ण रूमा बेलायत प्रवेशमा प्रतिबन्ध गरिएको छ । 

भारतमा मल्टिपल म्युटिसन भाइरस (बी१६१७) देखापरेपछि त्यसलाई विश्वभर पुग्नबाट रोक्नुपर्ने मत तीव्र बनेको छ । विभिन्न देशले भारतसँगको उडान स्थगित गरेपछि भारतीयहरू नेपाल भएर तेश्रो मुलुक गइरहेका थिए । नेपाल सरकारले पनि भारतीयहरूलाई नेपाल भएर तेश्रो मुलुक जान अनुमति दिदैं आएको थियो ।