चीनले केही उड्डयन र अन्तरिक्ष कम्पोनेन्टको निर्यातमा प्रतिबन्ध लगाउने

काठमाडौँ- चीनले जुलाई १ देखि केही उड्डयन र अन्तरिक्ष कम्पोनेन्टहरूको निर्यातमा नियन्त्रण गर्ने निर्णय गरेको छ ।

देशको राष्ट्रिय सुरक्षा र हितको रक्षा गर्न आवश्यक रहेको उल्लेख गर्दै चीनको वाणिज्य मन्त्रालयले उक्त निर्णय गरेको सीएनएनले जनाएको हो ।

---

चीनको भन्सार प्रशासन र केन्द्रीय सैन्य आयोगले संयुक्त रूपमा हस्ताक्षर गरेको विज्ञप्तिमा उल्लेख गरिएअनुसार एयरोस्पेस संरचनात्मक 'कम्पोनेन्ट' हरू साथै इन्जिन निर्माणमा प्रयोग हुने उपकरण र सफ्टवेयरलगायत वस्तुहरू निर्यात गर्न चाहनेहरूले निर्यात इजाजतपत्रको लागि आवेदन दिनुपर्नेछ ।

सूचीमा ग्यास टर्बाइन इन्जिनहरू, स्पेस सुट पार्ट्स निर्माणका लागि मोल्डहरू, साथै तिनीहरूलाई बनाउन प्रयोग गरिने उपकरण र सफ्टवेयर, र बुलेटप्रुफ कपडाहरूमा प्रयोग हुने उन्नत पोलिमरहरू पनि समावेश गरिएको जनाइएको छ ।

निर्यातकर्ताहरूले निर्यात इजाजतपत्रको लागि चीनको वाणिज्य मन्त्रालयमा आवेदन दिनुपर्ने विज्ञप्तिमा उल्लेख गरिएको छ ।