सयको नोटमा चुच्चे नक्सा समावेश गरेकोप्रति विजय जोलीको गुनासो

काठमाडौँ - भारतीय जनता पार्टीका नेता डा. विजय जोलीले नेपालमा बनेको कांग्रेस–एमालेको सत्ता गठबन्धनलाई नेपालका लागि समयको माग भएको टिप्पणी गरेका छन् ।

रिपोटर्स क्लबले बिहीवार काठमाडौंमा आयोजना गरेको साक्षात्कारमा उनले कांग्रेस–एमालेको सत्ता गठबन्धनलाई आफ्नो पार्टीको समर्थन रहने समेत बताए । उनले नेपालको आन्तरिक मामिलामा भारतले कहिल्यैपनि हस्तक्षेप नगरेको दाबी गरे । 

---

प्रधानमन्त्री ओलीको आसन्न चीन भ्रमण र बीआरआईबारे जोलीले नेपालका प्रधानमन्त्रीले कुन देश भ्रमण गर्ने भन्ने कुरा नेपालको निर्णय हुने भन्दै त्यसलाई आफूले सम्मान गर्ने बताए । उनले हरेक देशले आफ्नो स्वार्थको लागि कूटनीतिक रुपमा हात मिलाउने गरेको सुनाए । 

नेता जोलीले नेपाल र भारत बीच रहेका सीमा विवादपनि सरकारी, राजनीतिक र कूटनीतिक तहको सम्वादबाट हल गरिनुपर्नेमा जोड दिए । सीमा विवाद हल गर्नको लागि भारत सधैं तयार रहेको उनको भनाई छ ।

कुनैपनि मुलुकले आफ्नो पैसामा विवादित क्षेत्रको नक्सा समावेश गरेको नदेखेको भन्दै उनले नेपालले पछिल्लो समय आफ्नो एक सयको नोटमा चुच्चे नक्सा समावेश गरेकोप्रति गुनासो गरे । 

जोलीले आफू भारतीय जनता पार्टीको विदेश विभाग प्रमुख भइसकेको नाताले पनि विगत लामो समयदेखि नेपाल आवतजावत गर्ने गरेको स्मरण गरे ।