काबुलको ढोकैमा तालिबान

काठमाडौँ: तालिबान अफगानिस्तानको राजधानी काबुलको बाहिरी क्षेत्रमा प्रवेश गरेका छन् । अमेरिकी समाचार एजेन्सी एपीले तीन अफगानी सरकारी अधिकारीलाई उद्धृत गर्दै लेखेको छ, तालिबानी लडाकूहरू काबुलसँग जोडिएका तीन जिल्लामा प्रवेश गरेका छन् । ती जिल्लाहरु कालाकान, कराबाग र पाघमान रहेको बताइएको छ । 

तालिबान काबुलको नजिक पुगेको दाबीमा अफगानी सरकारले केही प्रतिक्रिया दिएको छैन । न त तालिबानले औपचारिक रुपमा केही बाेलेको छ । दुई पक्षबीच काबुलको बाहिरी भागहरूमा भिडन्त भने भएको छैन । 

---

तालिबानले आइतबार मात्रै काबुलबाट नजिकै रहेको जलालाबाद सहर कब्जा गरेको थियो । जलालाबादमा पनि तालिबान पुगेपछि अब अफगानिस्तान सरकारको नियन्त्रणमा काबुल र पाँच प्रान्तीय राजधानी मात्र छन् । अफगानिस्तानमा कुल ३४ प्रान्त छन् । एक साता भित्रै तालिबानले अधिकांश प्रान्तीय राजधानीहरूलाई कब्जामा लिएको हो ।