निवर्तमान अमेरिकी विदेश मन्त्री पोम्पियो सहित २८ अमेरिकी अधिकारीमाथि चिनियाँ प्रतिबन्‍ध

काठमाडौँ : चीनले अमेरिकाका निवर्तमान विदेश मन्त्री माइक पोम्पियो र अन्य २७ उच्च अधिकारीहरू माथि प्रतिबन्ध लगाउने घोषणा गरेको छ । चिनियाँहरूका बारेमा घृणा फैल्याउने काम गरेकाले उनीहरूमाथि प्रतिबन्ध लगाइएको चिनियाँ विदेश मन्त्रालयले जनाएको छ । 

नव निर्वाचित अमेरिकी राष्ट्रपति जो बाइडन ह्वाइटहाउस प्रवेश गर्दैगर्दा चीन सरकारले त्यस्तो निर्णय लिएको हो । अमेरिकी विदेश मन्त्रालय सम्हाल्दा चीनकाविरुद्ध लगातार अभिव्यक्ति दिएका पोम्पियोले आफ्नो कार्यकालको अन्तिम दिन पनि चीन सरकारले उइगुर मुस्लिममाथि नरसंहार गरेको आरोप लगाएका थिए । 

---

पोम्पियोसँग मात्रै होइन डोनाल्ड ट्रम्पसँग पनि आक्रोशित रहेको चीनले बिहीबार विज्ञप्ती जारी गर्दै पोम्पियो लगायतका अमेरिकी अधिकारीहरूले पछिल्ला वर्षमा लगातार आफ्नो मुलुक र जनतालाई अपमानित गर्ने अभिब्यक्ति दिने र कदम चालेकाे आरोप लगाएको छ । ‘चिनियाँ सरकार आफ्नो सार्वभौमिकताको रक्षाका साथै राष्ट्रि सुरक्षा र आर्थिक विकासका लागि प्रतिबद्ध छ । चीनलाई अवरोध गर्ने २८ अमेरिकीलाई प्रतिबन्ध लगाउने निर्णय गरिएको छ,’ चिनियाँ विदेश मन्त्रालयको विज्ञप्तीमा भनिएको छ । 

पोम्पियो बाहेक चिनियाँ प्रतिबन्धमा पर्ने ट्रम्प प्रशासनका अन्य अधिकारीहरूमा ब्यापार प्रतिनिधी पिटर नाभारो, राष्ट्रिय सुरक्षा सल्लाहकार रोबर्ट ओ ब्राइन र जोन बोल्टन, स्वास्थ्य सचिव एलेक्स अजर, संयुक्त राष्ट्रसंघका लागि राजदुत केल्ली क्राफ्ट लगायतका छन् । प्रतिबन्धमा परेका अमेरिकी अधिकारीहरू र उनीहरूका परिवारका अन्य सदस्यहरूले चीन, हङकङ र मकाउ प्रवेश गर्न पाउने छैनन् ।