काठमाडौँ : वरिष्ठ अधिवक्ता श्रीहरि अर्यालले राष्ट्रप्रमुखकको भूमिका उपयुक्त नभएको तर्क गरेका छन् । प्रतिनिधि सभा विघटनसम्‍बन्‍धी रिटमाथिको सुनुवाइको क्रममा संवैधानिक इजलासमा बहसमा भाग दिँदै राष्‍ट्रपतिले बदनियतपूर्ण काम गरेको जिकिर गरे । राष्ट्रपतिलाई त्यस्तो कुनै विशेषाधिकार नदिएको उनले सुनाए । 

'टिकटै नटाँसेको चिठीलाई स्वीकार गरेर बदनियतपुर्ण काम गर्नुभयो,' उनले भने, 'नागरिकता अध्यादेश, संवैधानिक अध्यादेश, मन्त्रिपरिषद् हेरफेरको कुरा । ५ जना कसरी चलाउने ? नियम कानुन हेर्नू पर्दैन ? प्रतिनिधिसभामा गएर सक्रिय गराउनुपर्ने, राष्ट्रियसभा बोलाउनुपर्नेमा राष्ट्रप्रमुखकको भूमिका उपयुक्त भएन । विश्वासको मत लिनु अनिवार्य छ । यो बाध्यकारी छ । आफैले आफूलाई पदमुक्त गर्ने असंवैधानिक पत्रलाई लिएर राष्ट्रपतिले मान्यता दिनु हुँदैनथ्यो । राष्ट्रपतिलाई त्यस्तो विशेषाधिकार दिएको छैन । सुधारिएको संसदीय व्यवस्थामा प्रधानमन्त्रीको कदम स्विकार्य छैन । राष्ट्रपतिले देउवालाई नियुक्त गरेर सदनमा पठाउने हो ।'