काठमाडौँ - नेपाली कांग्रेसका सहमहामन्त्री बद्री पाण्डेले सरकारले स्थानीय तहको निर्वाचनको घोषणा गरेर संविधानको रक्षा गरेको प्रतिक्रिया दिएका छन् । 

आज बसेको मन्त्रिपरिषद्ले २०७९ वैशाख ३० गते देशभरका स्थानीय तहको निर्वाचन एकैचरण गर्ने निर्णय गरेपछि पाण्डेकाे यस्ताे प्रतिक्रिया आएकाे हाे । इकागजसँग कुरा गर्दै उनले यसलाई उत्साहपूर्वक लिनुपर्ने बताए । 

उनले भने, 'संविधान र कानुनको व्यवस्था अनुसार आवधिक चुनाव अनिवार्य नै थियो, चुनाव घोषणा भयो यसलाई उत्साहपूर्वक लिएका छौं ।'

पाण्डेले संघीय लोकतान्त्रिक गणतन्त्रको दोस्रो निर्वाचन समयमै हुनुले यसले हाम्रो प्रणाली/व्यवस्थालाई संस्थागत गरेको प्रतिक्रिया दिए । 'संघीय लोकतान्त्रिक गणतन्त्र पछि पहिलो निर्वाचन भयो र दोस्रो निर्वाचन पनि समयमै गर्ने भनेको छ, यो देशले अंगीकार गरेको प्रणाली संस्थागत भएको प्रमाण हो ।'

 एमसीसीको कारणले निर्वाचनमा कुनै पनि असर नगर्ने उनले बताए । 'एमसीसी र निर्वाचन फरक कुरा हुन् । संसद सहज सञ्चालन भए र एमसीसी संसदमा टेबुल भए पास फेल होला' उनले भने, 'तर यसले निर्वाचनलाई फरक पार्छ जस्तो मलाई लाग्दैन ।'