बुटवल -  लुम्बिनी प्रदेशमा कोभिड-१९ बाट संक्रमण हुनेको संख्या बढिरहेको छ । जसका कारण विभिन्न जिल्लामा लकडाउन शुरु भएको छ । खासगरी लुम्बिनीका पहाडी जिल्ला पाल्पा, गुल्मी, अर्घाखाँचीलगायतका जिल्लामा  पनि संक्रमितहरूको संख्या बढेपछि लकडाउन गर्ने तयारी थालिएको छ ।  

संक्रमितको संख्या ५ सयभन्दा बढी भएपछि ती जिल्लामा कडाइ गरिएको छ । अर्घाखाँची जिल्लाका प्रमुख जिल्ला अधिकारी विष्णु पौडेलका अनुसार, अर्घाखाँची जिल्लामा ६ सय ५२ जना कोभिड भाइरसका सक्रिय संक्रमित छन् । यता बाँकेमा ६ घण्टाको फरकमा ३ जना कोभिड संक्रमितको मृत्यु भएको छ । जिल्ला कोभिड १९ संकट व्यवस्थापन केन्द्र बाँकेका 'फोकल-पर्सन' तेज ओलीका अनुसार, भेरी अस्पतालमा उपचारका लागि आएका सुर्खेत, दाङ र रोल्पाका संक्रमितको आइतबार बिहान मृत्यु भएको हो । 

भेरीगंगा नगरपालिका-१० सुर्खेतकी ३९ वर्षीया महिलाको उपचारका क्रममा मृत्यु भएको छ । भेरी अस्पतालमा उपचारका क्रममा आइतबार बिहान ८ बजेर ४५ मिनेटमा मृत्यु भएको हो । उक्त अस्पतालमा यही साउन ५ गते पिसिआर परीक्षण गर्दा उनलाई कोभिड पोजेटिभ देखिएपछि सोही दिन भर्ना भएकी थिइन् ।  

यस्तै तुलसीपुर उपमहानगरपालिका- १५ दाङका ४५ वर्षीय पुरुषको पनि भेरी अस्पतालमा मृत्यु भएको छ । उनको उपचारका क्रममा बिहान ८:३० मा मृत्यु भएको हो । भेरी अस्पतालमा यही साउन २१ गते पिसिआर परीक्षण गर्दा उनलाई कोभिड पोजेटिभ भएपछि भोलिपल्ट भर्ना भएका थिए ।  यसैगरी रोल्पा, लुंग्री गाउँपालिका वडा नम्बर ६ का ५८ वर्षीय पुरुषको मृत्यु भएको छ ।

भेरी अस्पतालमा उपचारका क्रममा आइतबार बिहान २ बजे मृत्यु भएको हो । भेरी अस्पतालमा गत असार २८ गते भर्ना भएका उनलाई भोलिपल्ट पिसिआर परीक्षण गर्दा कोभिड पोजेटिभ देखिएको थियो।  योसँगै कोभिड संक्रमणबाट बाहिरी जिल्लाका ३ सय ८६ र बाँकेका ३ सय २२ जनाको मृत्यु भएको फोकल पर्सन ओलीले जानकारी दिए । 

बांकेका विभिन्न प्रयोगशालामा गरिएको पीसीआर परीक्षण रिपोर्टले महामारी बढेको देखाएको हो । महामारी बढे पनि बजारमा भिडभाड र चहलपहल यथावत रहेको छ। सार्वजनिक यातायात निर्वाध सञ्चालन भइरहेका छन् भने सरकारी कार्यालय, बैंक तथा वित्तिय संस्था, रेष्टुरेन्ट, कटेजलगायतमा चाप अत्यधिक छ ।