आन्तरिक विमानस्थलमा भद्रगोल : न एक्सरे मेसिन, न सुरक्षाकर्मी
काठमाडौँ- त्रिभुवन विमानस्थलको आन्तरिक विमानस्थलको एक्सरे मेशिनहरू पुरानो र सुरक्षा जाँचमा जनशक्ति अभाव भएको छ । पुरानो मेशिन भएकाले चेकजाँचमा बाधा अडचन नआवस भनेर वायु सञ्चालक संघले सरकारको ध्यानाकर्षण गराएको छ ।
सुरक्षा चेकजाँचमा सहज र सजिलो बनाइदिनलाई संघले आग्रह गरेको छ । आन्तरिक विमानस्थलमा यात्रुको संख्या अनुपातमा पूर्वाधार तथा व्यवस्थापनको कमजोरी रहेकाले मन्त्रिपरिषद् तथा प्रधानमन्त्रीको कार्यालय र गृह मन्त्रालय सिंहदरबारलाई लेखिएको पत्रमा संघले उल्लेख गरेको छ ।
सुरक्षासम्बन्धी पूर्वाधारको कमी र सुरक्षा चेन ईन एरियामा एक्सरे मेशिन पर्याप्त नभएको र तथा भएका पनि ज्यादै पुरानो रहेको छ । पूर्वाधार कमी भएका कारणले गर्दा यात्रुहरूको दैनिक भिड बढेको र नेपाल सरकारद्वारा तोकिएको सुरक्षा मापदण्ड पालनासमेत भएको छैन ।
यात्रुहरू सुरक्षा चेकजाँचमा डेढ घण्टासमम्म लाइनमा बस्नुपर्ने बाध्यता रहेको संघले औँल्याएको छ । वायुसेवाहरूको पनि घण्टौँ ढिला उडान हुने गरेको छ ।
विमानस्थलमा कार्यरत कर्मचारी, प्राधिकरणका कर्मचारी र प्रहरीहरूले सुरक्षा चेकजाँचमा नभ्याएको तथा कर्मचारीहरू थकित र निरुत्साहित बनेको संघका प्रथम उपाध्यक्ष अनोज रिमालले बताए ।
'आन्तरिक विमानस्थलमा देखिएको समस्या समाधान नगरे दसैँ, तिहार र छठ जस्ता चाडपर्वमा यात्रुको चाप बढन गई गम्भीर अवस्था सिर्जना हुन्छ', रिमालले भने ।
चेक-इन गरिसकेपछि हाते ब्याग र शरीर जाँच गर्ने ठाउँको भित्ता फोडी रिमालले दुई गेटको सट्टा चारवटा बनाउन सुझाव दिए । पुरानो एक्शरे मेसिनहरू हटाएर नयाँ प्रविधिको यन्त्रहरू जडान गर्नुपर्ने उनको भनाइ छ । यात्रुहरूले जुत्ता र बेल्ट खोल्नुपर्ने व्यवस्था हटाउनसमेत उनले माग गरे । सबै एक्सरे मेसिनहरू सधैँ सुचारु राखी जगेडा पनि गर्नुपर्नेछ ।
आन्तरिक विमानस्थलमा सुरक्षाकर्मीको संख्या बढाउनुपर्ने रिमालको ठहर छ । 'प्रहरीको दरबन्दी बढाउन नसकेमा गैह्रप्रहरी जनशक्ति थप्नुपर्छ,' उनले भने ।
कोभिड-१९ को महामारीमा पनि आन्तरिक उडान सुचारु भएकाले हजारौ नेपाली आफ्नो गन्तव्यमा पुग्न सफल भएका छन् । आगामी दिनमा यात्रुको संख्या बढनेमा रिमालले विश्वास व्यक्त गरे । आन्तरिक उडानले राष्ट्रको अर्थतन्त्रमा थप टेवा पुग्ने उनले बताए ।
