काठमाडौँ : जनादेश आफ्नो पक्षमा भए पनि सर्वोच्च अदालतको परमादेशका कारण आफू सत्ताच्यूत हुनुपरेको भन्दै प्रधानमन्त्री केपी शर्मा ओलीले बहिर्गमन हुँदै गर्दा सर्वोच्च अदालतसँग चित्त दुःखाई गरे । सवारीसाधनको लावालस्करसहित ओलीलाई उनको निवास बालकोट भित्र्याउने तयारी गरिरहेको एमालेको भ्रातृ संगठन युथफोर्सले सर्वोच्च अदालतको आदेशबाट प्रधानमन्त्री हटाउने पहिलो घटना नेपालमा भएको भनेर प्रचार गरिरहेका छन् । यद्यपि यो सत्य होइन । 

सन् २०१२ मा पाकिस्तानको सर्वोच्च अदालतले त्यहाँका पूर्व राष्ट्रपति आसिफ अली जर्दारी मुछिएको भ्रष्टाचारको घटनाको फाइल पुनः खोल्न दिएको आदेश अटेर गरेको भन्दै तत्कालीन प्रधानमन्त्री युसुफ राजा गिलानीलाई ३० सेकेण्डको समय दिएर बर्खास्त गरेको थियो । त्यस्तै, थाइल्याण्डकी प्रधानमन्त्री यिङ्गलक सिनावात्रालाई सन् २०१४ मे मा अदालतको संवैधानिक इजलासले कार्यवहाक प्रधानमन्त्री तथा रक्षामन्त्रीबाट हटाइदिएको थियो । उनीमाथि सन् २०११ मा थाइ राष्ट्रिय सुरक्षा प्रमुखलाई हटाउँदा पदको दुरुपयोग गरेको अभियोग थियो ।