छ महिनापछि संसद्का १० समितिका बैठक एकैपटक सुरु

काठमाडौँ- निर्वाचन सम्पन्न भएको छ महिनापछि संसदीय समितिका बैठक बसेको छ ।​ सिंहदरबारस्थित संघीय संसद्को कार्यालयमा आज एकैपटक १० वटा विषयगत समितिहरूको बैठक सुरु भएको हो । सभामुखका प्रेस संयोजक शेखर अधिकारीका अनुसार बैठक बिहान ९ बजेबाट एकैपटक सुरु भएको हो । 

गत मंसिर ४ गते निर्वाचन सम्पन्न भएको छ महिना नाघिसक्दा पनि अझैसम्म विषयगत समितिका बैठक बस्न समेत सकेको थिएन । अघिल्लो अधिवेशनको अन्तिम दिनमा संयुक्त समितिसहित १० वटा विषयगत समितिमा रहने सदस्यहरू मनोनयन भएपछि आज पहिलो बैठक बसेको हो । आजको पहिलो बैठक भने समितिमा रहेका जेष्ठ सदस्यले सभापतित्व गरिरहेका छन् ।

जेष्ठ सदस्यले सभापतित्व गरिरहेको समितिको पहिलो बैठकमा ज्येष्ठ सदस्यले समितिका सदस्यहरूलाई स्वागत गर्ने, एक आपसमा औपचारिक रूपमा परिचय आदान प्रदान हुने र समितिमा आगामी दिनमा हुने छलफल र एजेन्डाका कार्यक्षेत्रका बारे जानकारी गराउने कार्यसूची रहेको संघीय संसद् सचिवालयका सहप्रवक्ता दशरथ धमलाले जानकारी दिए ।