तोसिमा कार्कीले संसदमा देखाइन् अस्पतालको बिल

काठमाडौँ– रास्वपा सांसद डा. तोसिमा कार्कीले संसदमा अस्पतालमा बिल देखाउँदै सरकारले कालोबजारी गरेको आरोप लगाएकी छन् । 

आइतबार प्रतिनिधि सभा बैठकमा बोल्दै उनले एक अस्पतालबाट किनेको औषधिको बिल देखाउँदै भनिन्, ‘निकै लाजमर्दो विषय उठान गर्दैछु । राज्यको ठगीको नमुना छ । मसँग शहीद धर्मभक्त मानव प्रत्यारोपण केन्द्रको एउटा बिल छ । यो डायलाइसिस गराइरहेका बिरामीको बिल हो ।’

उनले अगाडि भनिन्, ‘यसमा इपोफिट नामक औषधिको बिक्री मूल्य १४ सय ५ रुपैयाँ छ । यसको खाली खोल पनि मसँग छ जसमा अधिकतम खुद्रा मूल्य ५ सय भारु अर्थात् नेपाली ८ सय रुपैयाँ पर्न आउँछ  ।’

औषधिमा २० प्रतिशत अधिकतम नाफा राख्न पाउनेमा ७५ प्रतिशत राखिएको उनले बताइन् । कति प्रतिशत नाफा खाएपछि मात्र कालोबजारी मानिन्छ भन्दै उनले प्रश्न समेत गरिन् ।