मुलुकमा लगानीका लागि विश्वासको वातावरण बनाउनुपर्छ : बद्री पाण्डे

काठमाडौँ- नेपाली कांग्रेसका सहमहामन्त्री बद्री पाण्डेले मुलुकमा लगानीका लागि विश्वासको वातावरण बनाउनुपर्ने बताएका छन् ।

नेपाल सार्वजनिक सेवा कर्मचारी संघले बिहीबार भक्तपुरमा आयोजना गरेको सार्वजनिक तथा निजी क्षेत्र श्रम बजार अधिकार, चुनौती र आगामी कार्यदिशा विषयक कार्यशाला गोष्ठीलाई सम्बोधन गर्दै पाण्डेले विश्वासको वातावरण नहुँदा मुलुकमा पर्याप्त लगानी भित्रिन नसकेको र स्वदेशमा पनि पुँजी परिचालन हुन नसकेको भन्दै लगानीका लागि विश्वासको वातावरण बनाउनुपर्ने बताएका हुन् ।

स्वदेशमा लगानी गर्ने, नागरिकलाई स्वदेशमा नै अवसर प्रदान गर्ने लगायतका विषयमा ठूलो दलको हैसियतले कांग्रेस जिम्मेवार हुनुपर्ने उनकाे भनाइ छ । पाण्डेले नीति महाधिवेशनले गर्ने कामहरू गर्ने गरी महासमितिको बैठक बोलाइएको भन्दै विभिन्न नीति पारित गर्दै पार्टीलाई आन्तरिक रूपमा नै बलियो बनाउनुपर्ने धारणा राखे ।​

उनले पार्टीलाई सही दिशा दिँदै तीनै तहको सरकारलाई जिम्मेवार बनाउनुपर्नेमा जोड दिए ।