स्कुल बसको ठक्करबाट महिलाको मृत्यु भएपछि जनकपुर-जलेश्वर सडक अवरुद्ध

जकपुरधाम- विद्यालय बसको ठक्करबाट एक महिलाको मृत्यु भएपछि जनकपुर-जलेश्वर सडक अवरुद्ध गरिएको छ ।

साथै सो क्षेत्रको अवस्था तनावग्रस्त बनेको छ ।​ जनकपुरधाम उपमहानगरपालिका-२३ विन्हीमा जनकपुरधाम-९ मा रहेको एन्जल्स सेकेन्ड्री बोर्डिङ स्कुलको बसको ठक्करबाट स्थानीय ३५ वर्षीया राखीदेवी यादवको मृत्यु भएको थियो । भने, दुर्घटनामा अन्य चारजना महिला घाइते छन् । घाइतेहरूको जनकपुरमा उपचार भइरहेको छ ।

विवाहका लागि माटो खन्न पोखरीतर्फ गइरहेका महिलाहरूलाई तीव्र गतिमा आएको बसले ठक्कर दिएर कुल्चिएको थियो । दुर्घटनापछि स्थानीयले टायर बालेर जनकपुर-जलेश्वर सडक अवरुद्ध पारेर विरोधमा उत्रिएका हुन् । उनीहरूले सडकमा बिजुली पोलसमेत तेर्साएर विरोधमा उत्रिएका हुन् । 

ठक्कर दिएको बसलाई जलाउन खोज्दा प्रहरीले लाठीचार्जसमेत गरेको छ । घटनास्थलमा ठूलो संख्यामा प्रहरी परिचालन गरिएको छ ।