पूर्वराष्ट्रपति भण्डारी स्वदेश फिर्ता

काठमाडौँ– पूर्वराष्ट्रपति विद्यादेवी भण्डारी चीन भ्रमण पूरा गरी स्वदेश फिर्ता भएका छन्। उनी सोमबार बिहान त्रिभूवन अन्तर्राष्ट्रिय विमानस्थलमा अवतरण भइन्। भण्डारी जेठ १ गते नेपाली प्रतिनिधि मण्डलको नेतृत्व गर्दै चीन भ्रमणमा गएकी थिइन्। उनीसँगै नेकपा (एमाले) विदेश विभाग प्रमुख रघुवीर महासेठ, उद्योगमन्त्री दामोदर भण्डारी लगायत भ्रमण टोलीमा थिए। पूर्वराष्ट्रपति भण्डारीको चीन भ्रमण फलदायी र उपलब्धीमुलक रहेको उद्योगमन्त्री भण्डारीले बताए।

मन्त्री भण्डारीकाअनुसार भ्रमणका क्रममा पूर्वराष्ट्रपति भण्डारीले चिनियाँ उपराष्ट्रपति हान चेङ, सीपीसीका विदेश विभाग प्रमुख लिउ जियानचाओ लगायत उच्चपदस्थ अधिकारीहरुसँग भेटवार्ता गरेकी थिइन्।

भ्रमणका क्रममा चीन–नेपालबीचको द्विपक्षीय सहयोग आदानप्रदान, संस्कृति सम्बन्ध, अर्थ कुटनीति लगायतका विषयमा छलफल भएको उनले बताए।