महंगो रकममा अनमोलले साइन गरे ‘एक्स ९’मा

काठमाडौं : आफ्नो ब्यानरबाट घोषणा भएको फिल्म अलपत्र छाड्दै अनमोल केसीले ‘एक्स ९’ खेल्ने सम्झौता गरेका छन् । आइतबार बिहानै उनले सम्झौता भएको फोटो सार्वजनिक गर्दै आफूले ‘एक्स ९’ खेल्न लागेको जानकारी गराएका हुन् । 

मल्टिस्टारर फिल्ममा अनमोल केसीसँगै सौगात मल्ल, पुष्प खड्का, अनुपविक्रम शाही, नविन लम्साल आदि कलाकारको अभिनय रहनेछ । फिल्मलाई ‘लप्पन छप्पन’ सिरिजका निर्देशक मुकुन्द भट्टले निर्देशन गर्दैछन् । 

५ करोड हाराहारी बजेटमा बन्ने लागेको यो फिल्ममा अनमोलले ७५ लाख हाराहारी रकम लिएको चर्चा छ । तर, अघिल्लो पटक सम्झौता गर्दाका बखत पारिश्रमिक खुलाउँदै आएका निर्माताले यो पटक भने रकम लुकाएका छन् । ‘कृ’मा २० लाख लिएयता अनमोलले कुनै फिल्म साइन गर्दा पारिश्रमिक मुख्य आकर्षण हुने गरेको थियो । 

नेपालसँगै युरोपका विभिन्न सहर र आबुधाबीमा सुटिङ हुने फिल्मको तिहारपछि सुटिङ सुरु हुने निर्माण टिमले जनाएको छ ।   पुरुष कलाकारको जम्बो टोली रहने फिल्ममा प्रियंका थापा एक्लो हिरोइन रहनेछन् । 

फिल्ममा बलिउड अभिनेता सुनिल सेठ्ठीले पनि अभिनय गर्ने चर्चा थियो । निर्देशक मुकुन्द भट्टले खबरको पुष्टि गरे पनि इकागजले सुनिल सेठ्ठीसँगको इमेल वार्तामा भने खबरमा सत्यता नभएको जवाफ दिएका थिए ।  ‘यस्तो कुनै कुरा छैन,’इकागजको मेलमा सुनिल सेठ्ठीले जवाफ दिएका थिए । 

इकागजलाई प्राप्त जानकारीअनुसार सुनिल सेठ्ठीलाई काम गराउन महंगो पर्ने भएपछि निर्माण टिमले अहिले सोनु सुदलाई लिने प्रयास गरिरहेको छ । मुकुन्द भट्टले ‘वार’ र लप्पन छप्पनका दुई सिरिज निर्देशन गरेका छन् ।

दोस्रो भाग भने कोरोनाका कारण प्रदर्शन हुन सकेको छैन । ‘पारस’सँगै अनमोलले ‘माइतीघर २’ र ‘एन्टि हिरो’ पनि खेल्ने घोषणा गरेका थिए । तर, यी फिल्मको पनि सुटिङ कहिले हुने टुंगो छैन । योमध्ये ‘माइतीघर २’का निर्देशक सुबोध चोपडाको कोरोनाका कारण केही महिनाअघि मुम्बईमा निधन भएको थियो ।