सान्चो र भारान म्यानचेस्टर युनाइटेडको पहिलो एघारमा

काठमाडौँ-इंग्लिस प्रिमियर लिगमा आइतबार तीन खेल हुँदैछन् । दिनको पहिलो खेलमा बर्नलीले लिड्स युनाइटेडलाई आतिथ्यता प्रदान गर्दैछ भने दोस्रो खेलमा टोटनहम र वाटफोर्ड भिड्दैछन् । यस सप्ताहन्तको अन्तिम खेलमा म्यानचेस्टर युनाइटेड मोलिन्यु रंगशाला पुग्‍नेछ । 

उल्भरह्याम्पटनसँगको खेलमा ओले गनर सोल्स्यारले आफ्ना दुई नयाँ खेलाडीलाई मौका दिने भएका छन् । यसै सिजन युनाइटेडसँग आबद्ध भएका जेडोन सान्चो र राफाएल भारान पहिलो पटक पहिलो एघारमा पर्नेछन् । बोरुसिया डर्टमन्डबाट इंग्ल्यान्ड फर्केका सान्चोले युनाइटेडमा दुई लिग खेल खेलिसकेका छन् । तर दुवै खेलमा उनी बेन्चबाट मैदान प्रवेश गरे । भारानले भने नयाँ क्लबमा खेल्ने मौका पाइसकेका छैनन् । 

नर्वेजियन प्रशिक्षक सोल्स्यारले दुवै खेलाडी उल्भरह्याम्पटनसँगको खेलका लागि तयार रहेको बताएका छन् । ‘कारणवश जेडोन र राफाएलले ढिलोगरी प्रि–सिजन सुरु गरे । तर अहिले उनीहरु दुवैजना तयार भएका छन् । काभानी बिदाबाट भर्खरै फर्केका छन् । लिग खेल्न उनलाई केही समय लाग्‍न सक्छ,’ सोल्स्यारले भने । 

उनले स्कट म्याकटोमिने, मार्कस रासफोर्ड र एलेक्स टेलेसको रिह्याब चलिरहेको पनि जानकारी दिए । गोलरक्षक डिन हेन्डरसन पनि कोभिड–१९ संक्रमणबाट मुक्त भएको सोल्स्यारको भनाइ थियो ।