एनभीए च्याम्पियनसिपमा पुलिसलाई तेस्रो स्थान

महिलातर्फको प्रतिस्पर्धामा त्रिभुवन आर्मी र नेपाल पुलिस क्लबका खेलाडीहरु

काठमाडौँ- नेपाल पुलिस क्लब एनभीए महिला तथा पुरुष क्लब भलिबल च्याम्पियनसिपमा पुरुषतर्फ तेस्रो भएको छ । अन्तिम चारमा पराजित भएका दुई टिम शनिबार तेस्रो स्थानका लागि भिड्दा पुलिस विभागीय प्रतिद्वन्द्वी नेपाल एपीएफ क्लबमाथि हाबी भयो । 

काठमाडौँ, त्रिपुरेश्वरस्थित कभर्ड हलमा भएको खेलमा पुलिसले एपीएफलाई २५-१७, २५-१८, २५-१४ को जित दर्ता गर्‍यो । 

यसअघि पुलिस अन्तिम चारमा हेल्प नेपाल स्पोटर्स क्लबसँग पराजित भएको थियो । एपीएफ भने त्रिभुवन आर्मी क्लबसँग हारेको थियो । महिलातर्फको तेस्रो स्थानको भिडन्तमा भने पुलिसले हार बेहोरेको छ । पुलिसलाई आर्मीले ३-० को सोझो सेटमा पाखा लगायो । कभर्ड हलमै भएको खेलमा आर्मीले २५-१७, २५-२०, २५-१७ को विजय हासिल गर्‍यो । 

पुरुष तथा महिलातर्फ तेस्रो हुने दुवै टिमले एक-एक लाख नगद पुरस्कार प्राप्त गरे । 

अब पुरुषतर्फको उपाधिका लागि आर्मी र हेल्प नेपाल प्रतिस्पर्धामा उत्रनेछन् । महिलातर्फको फाइनलमा भने एपीएफ र न्यु डाइमन्ड स्पोर्टस क्लबबीच प्रतिस्पर्धा हुँदैछ ।