‘फास्ट एन्ड फ्युरियस’को दसौँ भागमा जोडिए जेसन मोमाउ

लसएन्जल्स - ड्वायन जोन्सनलाई फकाउने प्रयास असफल भएपछि निर्माण कम्पनी युनिभर्सल पिक्चर्सले ‘फास्ट एन्ड फ्युरियस’को दसौँ शृंखलामा उनको ठाउँमा उनकै जस्तो ज्यान भएका जेसन मोमाउलाई भित्र्याइएको छ । उनले भिन डिजेलको भिलेनको रुपमा काम गर्नेछन् ।

फिल्मले ट्वीटरमा जेसनको फोटो राख्दै टिममा स्वागत गरेको छ । जस्टिन लिनले निर्देशन गरेको यो फिल्मले अबका दुई भागपछि शृंखला नबनाउने निर्णय गरेको छ । अर्थात् १० र ११ बनेपछि यो शृंखलाको अन्त्य हुनेछ । 

फिल्ममा मिसेल रोड्रिगेज, टरेसे गिब्सन, चार्लिज थेरोन आदि कलाकार फिल्ममा निरन्तर रहनेछन् । यो फिल्म सन् २०२३ मा रिलिज हुनेछ । जेसन मोमाउ अक्वामेनका रुपमा चर्चित छन् । उनको मुख्य भूमिका रहेको यो फिल्मको दोस्रो भाग पनि प्रदर्शनका लागि तयार छ । सन् २००१ मा रिलिज भएको पहिलो भाग यता भिन डिजेल भने छुटेका छैनन् । भिन फिल्मका निर्माता पनि हुन् ।