तनहुँ प्रहरीको नियन्त्रणमा पल शाहका म्यानेजर

काठमाडौँ - नाबालिग बलात्कार आरोपी पल शाहका म्यानेजर कृष्ण जोशीलाई तनहुँ प्रहरीले नियन्त्रणमा लिएको छ । उनलाई पल शाहको मतियारको रुपमा प्रहरीले नियन्त्रणमा लिएको तनहुँ प्रहरी कार्यालय स्रोतले इकागजलाई बताएको छ । 

नियन्त्रणमा लिएसँगै प्रहरीले जोशीलाई सात दिनका लागि थुनामा राख्ने म्यादसमेत लिएको छ । घटनाको प्रमाण नष्ट गर्ने प्रयास गरेको, नाबालिगलाई हत्याको धम्कि दिएको तथा नाबालिगलाई होस्टाइल बनाएको भन्दै प्रहरीले उनलाई हिरासतमा राखेर अनुसन्धान गर्न अनुमति लिएको पनि तनहुँ प्रहरीले जनाएको छ । 

नाबालिगले पल शाहविरुद्ध प्रहरीमा बलात्कारको उजुरी दिएपछि फरार रहेको कृष्ण जोशीले एक युट्युब अन्तर्वार्तामा सरोज ओली, दुर्गेश थापा आदि मिलेर पल शाहको हत्याको योजना बनाएको दाबी गरेका थिए ।

उनले दिएको अन्तर्वार्ताकै आडमा सामाजिक सञ्जाल दुर्गेश थापा मुर्दाबाद भन्दै पललाई न्यायको माग गर्दै तातेको थियो । जोशीले लगाएको आरोप सरोज ओली र दुर्गेश थापा दुवैले सामाजिक सञ्जालमा स्ट्याटस लेख्दै खण्डन गरेका थिए । अहिले प्रहरीले पल शाहलाई थुनामा राखेर अनुसन्धान गरिरहेको छ ।