कोभिड–१९ को संक्रमणबाट दुईको मृत्यु

बुटवल : कोभिड-१९ को संक्रमणबाट बुटवलमा आइतबार दुई जनाको मृत्यु भएको छ । उनीहरू दुवै जनाको बुटवलस्थित कोरोना विशेष अस्पतालमा उपचारको क्रममा मृत्यु भएको हो । 

यसरी मृत्यु हुनेमा रुपन्देहीको सैनामैनाबाट उपचारका लागि लुम्बिनी प्रादेशिक अस्पताल, बुटवल पुगेका एक पुरुष छन् । स्वास्थ्यमा समस्या देखिएपछि अस्पताल पुगेका सैनामैना १ का ५५ वर्षीय पुरुषको कोरोना बिशेष अस्पतालमा उपचारका क्रममा मृत्यु भएको लुम्बिनी प्रादेशिक अस्पतालका प्रवक्ता डा. विष्णु गौतमले जानकारी दिए । 
 
कोरोना पुष्टि भएलगत्तै कोरोना बिशेष अस्पताल पठाइएकोमा भेन्टिलेटरमा राख्दाराख्दै उनको मृत्यु भएको हो । उनमा  उच्च रक्तचापको पनि समस्या थियो । 

यस्तै बुटवल उपमहानगरपालिका २ की ७० वर्षीया महिलाको पनि कोरोना विशेष अस्पतालमा मृत्यु भएको छ । कात्तिक १६ गते संक्रमण पुष्टि भएपछि १७ गते अस्पताल भर्ना भएकी उनको पनि उपचारको क्रममा मृत्यु भएको हो । 

प्रदेश स्वास्थ्य निर्देशनालयका अनुसार अहिलेसम्म रुपन्देहीमा संक्रमणबाट मृत्यु हुनेको संख्या ८३ र लुम्बिनी प्रदेशमा एक सय ९७ पुगेको छ ।