दुई लाख ७४ हजार ई–पासपोर्ट जारी, २ अर्ब ६७ करोड राजस्व उठ्यो

काठमाडौँ– राहदानी विभागले गत वर्ष मंसीर १ बाट जारी गर्न थालेको ई–पासपोर्ट (विद्युतीय राहदानी) २ लाख ७४ हजार सात सय चार थान वितरण भएको छ । ई–पासपोर्टबाट सरकारलाई २ अर्ब ६७ करोड ९५ लाख ६ हजार दुई सय ३१ रुपैयाँ राजस्व संकलन भएको विभागले जनाएको छ । 

विभागले गत वर्ष मंसीर १ मा पहिलो राहदानी शताब्दी पुरुष सत्यमोहन जोशीलाई हस्तान्तरण गरी औपचारिक रूपमा ई–पासपोर्ट वितरण शुरु गरेको थियो । 

परराष्ट्र मन्त्रालयका अनुसार, अहिले ६९ जिल्ला प्रशासन कार्यालय, १५ ईलाका प्रशासन कार्यालय र २६ कूटनीतिक नियोगहरूबाट ई–पासपोर्ट जारी भैरहेको छ । ‘बाँकी जिल्ला प्रशासन कार्यालय र नियोगहरूमा तदारुकताका साथ उपकरण जडान गरी सेवा प्रवाह शुरु गर्ने तयारी भैरहेको छ,’ मन्त्रालयकी प्रवक्ता सेवा लम्सालले भनिन्, ‘जिल्ला र ईलाका प्रशासन कार्यालयहरूबाट दिइने सेवा विस्तार भएसँगै राहदानी विभागमा आउने आवेदकहरूको संख्यामा क्रमिक रूपमा कमी आई सेवा प्रवाह सहज हुँदै गएको छ ।’ 

यद्यपि उनले थाती रहेका आवेदनका कारण विभागमा सेवा प्रवाहको चाप भने कायमै रहेको बताइन् । सेवाग्राहीलाई सहज बनाउन राजस्व अनलाइनबाटै बुझाउन सकिने लम्सालले जानकारी दिइन् । 

‘सेवा प्रवाहमा सहजता ल्उाउन मोबाइल एपको निर्माण र सफ्टवेयरमा सुधार गर्ने कार्यहरू भइरहेको छ,’ उनले भनिन्, ‘केही दिनमै सफ्टवेयरको अपडेटेड भर्सन कार्यान्वयन गर्ने तयारी रहेको छ ।’